– Det kryr av talent her

Bildeserie:

1 av 8

I fjor stilte over 70 ungar då Os friidrett arrangerte den første friidrettsskulen i historia. Då skulen starta onsdag var det ikkje fleire enn 15 deltakarar, men ytterlegare 10 er meldt på i frå i morgon når dei fleste fotballskulene i bygda er ferdige.

– Det er framleis mogleg for fleire å bli med. Det er berre å møte opp på Kuventræ klokka ni, så ordnar vi påmelding, fortel arrangørane.

– Alle burde vore her

Instruktørar på skulen er dei eldste friidrettsutøvarane som har gjennomført aktivitetsleiarkurs gjennom vinteren godt støtta av Kristin Davanger og Jan Borgen ute på banen, og ivrige styremedlemmar på kjøkenet og bakrommet.

– Det kryr av av talent her og dukkar stadig opp fleire. Friidrett er noko både fotballspelarar og handballspelarar i bygda hadde hatt godt av å teste ut. Du får det ikkje så mykje meir allsidig enn dette, seier Borgen.

Lange kast og høge hopp

Onsdag førmiddag blei mest brukt til å bli kjent med kvarandre og til leik og moro.

– Ungane har òg lært seg å samarbeide. Ei av øvingane var å kasta ein vannballong ved hjelp av eit seil frå ei gruppe til ei anna. For å få det til var dei nøydde til å få til teknikken og gjera det på likt.

– No utover ettermiddagen er planen at dei skal få testa spyd og liten ball i tillegg til høgde og sprint.

– Vi deler dei inn i grupper på fire fem utøvarar i dag som blir følgd rundt og får instruksjonar frå ungdommane vi har med oss.

Lærer sjølv òg

Borgen fortel at ungdommane som er med også lærer nye ting på skulen.

– Det å skulle læra frå seg er med på å utvikle utøvarane våre. Dei må tenkje gjennom kva og korleis dei gjer ting når dei skal forklara det for andre. Nokre får kanskje ein aha-oppleving av korleis det skal gjerast og at dei sjølv kanskje ikkje gjer det heilt på den måten. Slik blir det god læring både for den eine og den andre, fortel friiidrettsnestoren.

Brannvesenet på vitjing

Som i fjor har friidrettsgruppa fått med seg Lerøy til å levera sunn og næringsrik fiskelunsj og brannvesenet til å gi eit spennande avbrekk i løpet av dagen.

– Vi har jo vore like heldig med vêret i år som i fjor, så torsdag kjem brannvesenet for å kjøle ned deltakarane slik som dei gjorde i fjor. Det kan kanskje vera greitt å ha med seg eit skift, smiler arrangørane.

Friidrettsskulen er for barn frå 7 til 12 år.