Dømt for 17 forhold

Ein osing i 30-åra er dømt for heile 17 forhold og fekk 7 månadar fengsel som ein samla dom.

Sikta blei i desember i fjor dømt til 120 timar samfunnsstraff, men sidan han berre har gjennomført 31 av desse timane blei den resterande straffa slått saman med dommen for 7 nye punkt.

Sikta møtte i retten og tilsto. Dei mest alvorlege punkta var innbrot og tjuveri på ei privat adresse i Bergen.

Der stal han blant anna ein kaffimaskin og ein bluerayspelar, men også nokre bilnøklar for så å stela bilen saman med ein han utførte innbrotet med. Det var han andre som kjørte bilen.

Stal hjartestartar og Mercedes-stjerne

Blant dei andre punkta var tjuveri av hjartestartar på Amfisenteret i Os, tjuveri av kartplottar og stereoanlegg frå ein båt, fleire tilfelle av oppbevaring av narkotiske tablettar, naskeri i Os og Bergen og bæring av kniv og softgun på offentleg stad.

Sikta er tidlegare dømt åtte gongar før.

No blei han dømt for desse 17 forholda: eitt grovt tjuveri, eitt bruksbiltjuveri, eitt tjuveri, fire naskeri, to skadeverk, eitt tilfelle av kniv på offentleg stad, eitt brudd på våpenlova og seks tilfelle av oppbevaring av narkotika.

I tillegg til fengsel må domfelte betala 700 kroner til ein han stal ei Mercedes-stjerne av.