E39-planen er klar

Bildeserie:

1 av 5

Referansegruppa for den statlege kommuneplanen for E39 Stord-Os fekk i dag presentert Statens Vegvesen si tilråding som i løpet av hausten vil komma på høyring.

Ordførar Terje Søviknes (Frp) er glad for tunnellgjennomslag.

– Det er kjekt å registrera at Os kommune har fått gjennomslag for tunnell frå Søre Øyane til Moberg. Tunnelløysinga er 1,6 milliardar rimelegare enn dagløysinga. Eg tykkjer også det er gode kryssløysingar på Os-sida med av- og påkøyringsramper i fjell mot Sør og kryss i Kolskogen. Dette er bra, oppsummerar Søviknes.

Landar utforbi Røttinga

Konklusjonen til vegvesenet når det gjeld E39 på Os-sida er:

«Brua over Bjørnafjorden når land på ein utfylt holme sør for Røtinga. Derifrå blir det ein overgang med senketunnel til ein når det faste fjellet og tunnel vidare til Moberg.

Frå tunnelmunning på Moberg går vegen i bru over Ulvenvatnet vest for Mobergbrua. Dagens veg blir kopla opp i eit felles kryss sør for Svegatjørn. Frå dette krysset er det muleg å etablere ein ny direkte tilkomst til Os sentrum.

Sør for Moberg, ved Lekven, vil det vere tenleg å bygge av- og påkøyringsrampar mot sør. Dette vert i tilfelle bygd som kryss i fjell.»

43 eller 39 milliardar kroner

I planomtalen som Statens Vegvesen har utarbeidd kjem det fram at dei tilrår utbygging av alternativ B for strekninga mellom Ådland og Svegatjørn.

– Etter vurdering av kostnader og konsekvensar, tilrår Statens vegvesen utbygging av alternativ B for E39 Stord - Os, Ådland – Svegatjørn med tunnelløysing på Os (vestre linje), figur 3. Ei full utbygging med K7; endeforankra flytebru over Bjørnafjorden, er kostnadsrekna til 43 mrd.kr. Med K8 sideforankra flytebru er kostnadstalet 39 mrd.kr, heiter det i planomtalen.

Ikkje rørbru

Vidare har vegvesenet lagt vekk alternativet med rørbru over Bjørnafjorden.

– I kommunedelplanen legg vi til grunn K7, endeforankra flytebru i kostnadsberekningane. I vidare planarbeid vil Statens vegvesen optimalisere dei tre brukonsepta. Avgjerd om brutype; K1/K2, K7 eller K8, må takast på eit seinare tidspunkt.

– Rørbru har vore utgreidd som eitt av tre hovudkonsept for kryssing av Bjørnafjorden. Ei rørbru har mange fordeler: Den syns mindre i landskapet, den har gode og jamne køyreforhold, og den er mindre påverka av vind og bølgjer. Vi har valt å gå bort frå rørbru i Bjørnafjorden då dei første kostnadsberekningane viser at ei løysing med rørbru vil innebere høgare kostnader enn bru over vatn. Med rørbru ville vi fått samanhengande tunnel frå Gjøvåg til Moberg, ei lengde på ca. 15 km, skriv dei vidare.

Tre bru-alternativ

Dei tre alternative brutypene vegvesenet vil jobba vidare med er:

K1/K2 Multispennhengebru med tårn på flytarar(TLP):

I dette brukonseptet nyttar vi kjend hengebruteknologi og kombinerer denne med teknologi frå offshore.

To av brutårna blir plasserte i fjordbassenget på flytande plattformer. Brutårnet lengst i sør står på Svarvhellaholmen, og brutårnet i nord er plassert på Flua sør for Røtinga. Dei flytande plattformene og tårna kan vere i stål eller betong. Med ein slik brukonstruksjon vil vi ha seglingshøgde inn mot land på ca. 20 m, og midtfjords vert seglingshøgda høgare enn minimumskravet på 45 m i 400 m breidde.

K7 Endeforankra flytebru med seglingsleid i sør:

Dette er ein brukonstruksjon etter tilsvarande prinsipp som Nordhordlandsbrua. Brua er fast innspent i begge endar og ligg i ein boge mellom Svarvhellaholmen på Tysnes og Flua sør for Røtinga i Os. Seglingsleida er plassert i sør med ei skråstagbru på Svarvhellaholmen. Seglingshøgda der er 45 m. Mindre fartøy kan passere under brua i heile fjordbassenget.

K8 Sideforankra flytebru med seglingsleid i sør:

Medan endeforankra flytebru er fast innspend i kvar ende, er sideforankra flytebru forankra med forankringsliner frå pontongar til botn. Brua vil ligge i ei rett linje. Seglingstilhøva vil vere dei same som for endeforankra flytebru.

– Ut frå det ein veit om grunntilhøva, er K7; boga flytebru, eit byggbart alternativ.

For å vurdere dei to botnforankra brukonsepta: K1/K2 multi-spenns hengebru og K8 rett flytebru vidare, arbeider vi med å samle meir omfattande datagrunnlag om grunntilhøva, og vi analyserer dei resultata som allereie ligg føre. Meir detaljerte grunnundersøkingar kan redusere usikkerheitspåslaget i kostnadsanslaga for desse brukonsepta, skriv vegvesenet i planomtalen.

Anleggsveg blir sykkelveg

Fleire av dei som bur i Søre Øyane har stilt spørsmål omkring korleis ein vil komma seg ut til landfestet ved Røttingaflua. I planomtalen skriv Statens vegvesen:

«I nord vil det vere aktuelt å ha tilkomst til brufeste frå sjøsida. I tillegg bør det byggast ein enkel anleggsveg, som seinare blir sykkelveg, i Søre Øyane. Det vil i neste planfase bli meir fokus på anleggsdrift og nødvendig areal i tilknyting til dette.»

Vurderingar for nærmiljø og friluftsliv

Planomtalen omtalar ulike vurderingar av konsekvensar av prosjektet, mellom anna temaet nærmiljø og friluftsområde.

– I alt er det verdivurdert 45 delområde innafor plan- og influensområdet. For friluftsliv er dei største verdiane knytt til område med høg regional verdi. Kobbavågen og Søre Øyane i Os er sentrale, i tillegg til Bårdsundet, Flatråkervassdraget og Søreidsvika på Tysnes.

– I Os kommune er Moberg og Kuventræ (nær Ulvenvatnet) sjølve hjartet i aktivitetar for barn og unge med mange typar idrettsanlegg, fleire barnehagar, barneskule, vidaregåande skule m.m. Områda er nokså godt utbygde med fortau eller gang- og sykkelveg som sikrar trygg tilkomst til skule og idrettsanlegg, men dagens E 39 ligg som ein barriere og støykjelde. Området Halhjem - Moberg vert avlasta i alle alternativ medan området rundt Ulvenvatnet- Svegatjørn (Kuventræ) vil få ennå større belasting uansett alternativ.

Ny badeplass på Røttinga

Vegvesenet listar opp fleire avbøtande tiltak i høve utbygginga. Av tiltaka dei ser føre seg på Os heiter det.

• Kompensere Kobbavågen med tilrettelegging av ny badeplass Røtinga – erstatning/istandsetting /omforming – tilkomst frå land er ein viktig kvalitet å sørgje for
• Sikre / leggje til rette for samanhengande turveg under ny bru rundt Ulvenvatnet
• Støyskjerme mot frilufts- og uteområde for opphald og aktivitet kring Ulvenvatnet og idrettsanlegg på Kuventræ. (Det er lagt til grunn for utgreiinga at dei 2 barnehagane nærast E39 får ny lokalisering).