Endring i haustprogrammet

20. september står minioperaen Figaros bryllup oppført i Oseana sitt haustprogram.

-No er denne konserten endra til ein konsert med Klassiske Operaperler av den grunn at vi var heldig og fekk Figaros Bryllup som ein del av kammerkonsert-programmet i sommar, fortel Janne Mari Hjelle frå Oseana.

Janne Mari fortel at konserten i sommar var godt besøkt, og at det er omtrent det same ensemblet som kjem tilbake, men denne gong med klassiske, kjende operaarier frå fleire operaer.

Ung trio

Trioen består av unge musikarar, Jørgen Backer - baryton, Kari Ulfsnes Kleiven - sopran og Åse Mathiesen Palm - klaver.

Backer har sidan han tok mastereksamen i 2012 jobba i Den Norske Opera og Ballett kor han har spelt over 50 framsyningar. Kleiven har sidan 2014 vore ein del av Nasjonaloperaen sitt solistensemble og blir blant anna å sjå som Franquita i Carmen. Palm verkar som freelancepianist og kariera innkluderar mellom anna konsertar på hovudscena i Den Norske Opera, Oslo konserthus og ved Gotland Chamber Music festival.

- Denne kvelden vil vi få oppleva perler frå blant anna Carmen, Cosi fan tutte, Don Pasquale, Faust og mange fleire, seier Janne Mari som ønskjer alle velkommen til ein stemningsfull operakveld i Oseana.