Er det NM-billettar igjen?

I morgon tar Lysekloster imot Sogndal, torsdag speler Os mot Brann.

– Eg har rundt 35 billettar igjen, seier Rolf Tveit.

Han fekk inn 250 billettar til Lysekloster-Sogndal for sal på Best-stasjonen.

I går starta også salet i klubbhuset i Lysefjorden.

– Vi har selt godt her ute òg, men har framleis billettar igjen, og kjem til å selja på Kuventræ før kampstart i morgon, seier Svein Kollen.

Vil sjå sonen slå Sogndal

I dag var Geir Jonassen på Os for å kjøpa billett til Lysekloster-Sogndal.

– Det er heilt greit å kjøpa billett, det er mi form for støtte til idrettslaget. Eg kjøper alltid billett til seriekampane òg.

– Det var stor stemning i heimen då vi trekte Sogndal, seier Geir Jonassen, far til Lysekloster-back Baste Jonassen.

Os utselt - Brann har meir igjen

Det var 150 i kø utanfor klubbhuset då billettsalet til Os-Brann starta måndag morgon, etter 10 minutt var 660 billettar selt.

Også hos MX Sport var det frå klokka 10 same formiddag rift om billettane.

Billettsalet i Os er no stengt.

– Vi har no selt alle våre 1600 billettar, dei einaste som er igjen er dei 600 som SK Brann har fått til bortepublikummet, fortel arrangementsansvarleg og styremedlem i Os Fotball Egil Hodneland.

– Eg synest det er utruleg kjekt å sjå kor stor interesse som ligg latent i bygda, berre det skjer noko interessant. Både då vi ville tilsetja Hassan El Fakiri og var ute i sponsormarknaden for å få finansiering til satsinga, og no når vi frir til pulikum med ekstra interessant motstandar, så vil osingane koma og sjå.

Hos SK Brann starta billettsalet då El Fakiri sjølv leverte billettane måndag formiddag. Der har det gått noko seinare.

– Vi har selt greit, rundt 100 av 600 billettar, opplyser ein av dei tilsette i Brannbutikken.

Mange risikerer å ikkje koma inn

– Dette er vanleg. Det er lite førehandssal og eit rush på kampdagen, seier salssjef i Brann, Dag Frode Algrøy.

Vanlegvis har Brann levert uselte billettar til vertskapen for sal i døra.

Etter det Midtsiden kjenner til ønskjer Os Fotball å unngå billetsal i døra og potensielt skuffa supportarar som ikkje kjem inn på Kuventræ kampdagen.

– Det stemmer, vi ønsker å unngå billettsal på Kuventr kampdagen. Alle som vil sjå Os-Brann må kjøpa billettar på førehand, seier Hodneland.

– Om Os vil unngå å selja i døra, at dei vil selja alt på førehand, så må Brann-fansen vera om seg. Elles må vi i dialog med Os for å høyra kva vi skal gjera med det vi eventuelt ikkje har selt til torsdag, seier Algrøy.