Frå Wembley til Haugland

Bildeserie:

1 av 7

Anledninga er «The Elton Show - A celebration of the Rocket Man» som laurdag blir spelt på USF Verftet.

– Det er ein hyllest til Elton John sine største hits.

– Dette er eit heilt nytt show som blir presentert for første gong i Noreg med storband.

– Eg har gjort noko tilsvarande i Canada ein gong tidlegare, fortel australieren med knytninger til Os, CJ Marvin.

Nettopp knytninga til Os gjorde at dei fekk tilgang til ungdomshuset på Haugland for å gjera dei siste førebuingane. Praktisk òg med tanke på at ei av kordamene, Fabiana Tavares, bur på Halhjem. Musikarane er nemleg innkvartert hjå vener og kjente i området.

Sjelden har det vel vore eit så høgt nivå på musikken i ungdomshuset som desse dagane.

Gjorde eit scoop

CJ Marvin har fått med seg musikkvener frå heile verda.

– Dei tre italienerane Maurizio Vercon, Alessandro Leonzini og Giancarlo Spirito spelte eg med på forskjellige scener rundt i Europa frå 81 til 89.

– Ray Johnson er busett i Stavanger og er eksepsjonell på piano. Dei tre jentene i koret, Marianne Moen frå Notodden, Miriam Sleire frå Bergen og Fabiana, som bur her på Os, er òg damer eg har jobba tidlegare med.

– Men sjølve scoopet gjorde eg då Charlie Morgan takka ja til å bli med.

– Det er ei stor ære at han vil vera med på denne produksjonen, smiler CJ Marvin, som sjølv trakterar flygelet og rolla som Elton John i hyllesten til artisten.

Med ungdommeleg pågangsmot

CJ har vore stor fan av Elton John, heilt sidan han som 16 åring reiste frå Italia til heimstaden Melbourne i Australia, fast bestemt på å møta idolet.

– Eg hang rundt The Hilton, hotellet dei budde på og kom i kontakt med dei som då var musikarane til Elton John.

– Dei fortalde historia til Elton John og eg blei invitert til å møta han.

– For å gjera ei lang historie kort, så endte det med at eg fekk backstage-pass personleg frå Elton John.

– Etter det har eg møtt Elton og bandet eit utal ganger når dei har vore ute på turné.

– Kvar gong har eg endt opp backstage og på scena saman med gitarteknikarar og andre i crewet. Det var på den måten eg møtte Charlie tilbake i 1992.

– Etter det har vi halde kontakten, fortel CJ Marvin.

Ein av dei beste i England

Charlie Morgan var ein av dei to topp-ranka session-trommeslagerane i England og spelte mellomanna med Nik Kershaw på hans sitt første album i byrjinga på 1980-talet.

– Nik Kershaw og George Michael kora for Elton John på «Nikita».

– Elton John hadde då høyrd plata til Nik og fortalde at han likte trommene og ville ha den trommeslageren som spelte der.

– Dermed blei eg hyra inn til å spele nokre sesjonar saman med Elton John.

«Live Aid» første jobben

Elton John var nøgd med det trommeslagaren viste og lurte på om han ville vera med på ein liten gig.

– Eg skal spele ein liten veldedigheitskonsert for Bob Geldoff, vil du vera med spurte han.

– Jo, det kunne eg vel, og plutseleg sat eg framfor 72 000 tilskodarar på Wembley og eit utal via TV-skjermane, smiler Morgan.

13 år på vegen med Elton John

På veg ned frå scena var Elton John så nøgd med framsyninga at han ba manangaren om å få med musikarane på verdsturné.

– Det blei starten på 13 år på vegen med Elton John.

– Vi har spelt 12 verdsturnear og 7 album saman, oppsummerer Morgan som tilsaman har gjort 516 show med Elton John.

– Kjem til å bli mykje gøy

Laurdag speler dei på USF Verftet for første gong saman. Før musikarane blei samla på Haugland har dei øvd kvar for seg på det vel to timar lange reportoaret.

– Det kjem til å bli mykje gøy.

– Allereie no fungerar det veldig bra, skryt Morgan, som i tillegg til å spele trommer har tatt på seg ei ekstrarolle med å bringe den autentiske Elton John-lyden inn på settet.

– Hyllesta er ikkje ein kronologisk konsert over alt Elton John har gjort i si lange karriere.

– Det blir ein vintage-konsert kor vi konsentrerar oss om perlene frå 70- og 80-talet, men nokre nyare låter får vi òg plass til, fortel CJ Marvin.

Vil på turné

På spelelista står hitsa på rekkje og rad - Your Song, Saturday Night´s All Right for Fighting, I´m Still Standing og Rocket Man for å nemne nokre.

– Eg håpar jo at vi kan leggje ut på turné med dette showet.

– På mange måter blir dette ein test på om det er noko publikum liker.

– Det langsiktige målet er at vi kan sette showet opp i London eller på Broadway, avsluttar CJ Marvin som håpar Elton John-fans tek turen til Bergen laurdag.

Video, 3:30: Høyr det delar av The Rocket Man og øvinga i ungdomshuset på Haugland. Foto: Andris Hamre/Midtsiden.no