Gav Bryne poeng

Fredag i førre veke signerte han kontrakt med Bryne, allereie sundag fekk Mats Cato debuten sin og spelte heile kampen då Bryne tapte 0-1 for Ranheim på heimebane.

Onsdag kveld sørgja Moldskred for poeng til Bryne mot Sogndal på bortebane.

- Eg er glad eg greip sjansen, seier han til Midtsiden.no om eigen overgang frå Løv-Ham til Adecco-konkurrent Bryne.

Bryne låg under 2-0 for Sogndal, men utlikna på to minutt. Først reduserte Aleksander Midtsian (ja, med det etternamnet skulle han hatt jobb i ei nettavis på Os). Skåringa kom på straffe som Mats Cato skaffa då han blei felt. To minutt seinare fekk han nettkjenning sjølv.

- Midtstopparen til Sogndal rota litt med ballen. Eg snappa den og kom til skot frå 25 meter, fortel den ferske Bryne-spelaren.

Ballen gjekk rett i kryssen og Moldskred fekk si første skåring i sin andre kamp for Bryne, fem dagar etter signering.