God start for juniorlaget

Os starta i fjor på botnen med to nye juniorlag og rykte opp til 2. divisjon med begge.

No er serien i gang, og medan Os 2 har starta med 5-7-tap for Åsane G16 og 3-3 mot Sandviken/Varegg har Os 1 starta med 7 poeng på 3 kampar.

– Vi burde slått Tertnes òg. Spelarane sto i kø for å skåra, men var svake på avslutning i starten, så vi måtte nøya oss med 1-1, seier trenar Rune Balland.

Toppar tabellen

Mot Sotra borte og heime mot Øystese laurdag gjekk det betre, med 6-2-siger i begge kampane.

– Vi leia 2-0, men så klarte Øystese å utlikna før pause. I 2. omgang var vi tilbake i føringa og det blei ein solid og velfortent siger.

Philip Moe Haugland sette inn 4 av Os sine 6 mål og Os toppar no tabellen før Nest-Sotra og Vadmyra har spelt runde 3.

Ut av NM

– Vi sparte ein del spelarar laurdag då dei var med i NM-kampen mot Stord fredag kveld.

– Der tok vi leiinga 1-0, men Stord overtok og var mykje betre oss ein periode.

Stord gjekk opp i 1-3 før Os kom tilbake og reduserte til 2-3.

100 spelarar på veg mot A-laget

Rett bak A-laget til Os ligg det nesten 100 unge spelarar i utvikling opp mot 3. divisjon og eventuelt høgare nivå.

Over 50 gutespelarar og drygt 40 juniorspelarar, fordelt på tre gutelag, to juniorlag og senior 5. divisjon, rullerer og hospiterer for at alle skal få noko å strekka seg etter.

– Det er nokre fine og spennande grupper, med fleire spelarar med potensiale til å nå godt forbi 3. divisjon, seier Ørnulf Jacobsen.

Den tidlegare gutelagstrenaren har ansvar for eliten av juniorane, spelarane som skal bidra på Os 2 i 5. divisjon og prøvast inn mot A-laget.

– Eg føler opplegget Bakkerud har sett saman og kommunikasjonen oss trenarar imellom fungerer veldig bra. No har vi gutar som er oppom juniorlaga for å få matching og juniorane får ulike nivå å bryna seg på.

– Målet er å utvikla kvar einaste spelar best mogleg. Vi har også Cato Moldskred med oss på individuell oppfølging. I så store grupper krev det mykje å sjå alle, men eg opplever no at det er god rullering av spelarar som får nye utfordringar, og ein raud tråd frå A-laget og nedover, seier Jacobsen.