– Han var neppe noko proff

I mars for to år sidan tok nokon seg inn gjennom ein mur på sida av butikken og stal verdia for 60.000 kroner.

Natt til i dag var det nattlege gjestar i butikken igjen, også denne gong tok vedkomande seg inn gjennom ein vegg.

– Eg byrjar å bli lei, det er mykje som blir øydelagt når du blir utsett for innbrot, seier kokken Kenneth Milde, som jobbar i ferskvareavdelinga i butikken.

– Men han fekk no ikkje så mykje med seg, sjølv om kameraopptak viser at han var i butikken i 50 minutt, humrar han.

Stal tom tippekasse

Kameraopptaka frå butikken viser at mannen kom inn gjennom bakveggen i 23.30-tida i natt og var åleine, i alle fall inne i butikken.

– Han var også på kontoret, men kunne gløyma å opna tobakksskapet.

I staden tok han med seg Norsk Tipping-kassen og sprang ut.

– Kassen var tom for pengar, den fann vi knust og opna bak butikken. Det var nok ikkje ein særleg proff tjuv.

Ber om tips

Butikken har alarm og denne blei utløyst.

Milde fortel at vaktselskapet skal ha vore der, og gått ein runde rundt butikken, utan å ha sett noko unormalt.

– Vi får ta oss ein prat med vaktselskapet igjen seinare. Akkurat no handlar det om å få tetta veggen og få tippinga opp og gå igjen.

Politiet har vore på staden og sikra spor.

– Om nokon har sett folk i området i 23.30-tida, eller seinare på veg frå butikken, eller har kjennskap til andre ting som kan knyttast til saka, er vi interessert i tips, seier politiet.

Politiet i Os når du på 480 02 480.