Her hamna kveita til Haugan

Bildeserie:

1 av 2

Søndag morgon gjekk hobbyfiskar Frode Haugan sin over 30 år gamle draum i oppfylling; i garnet han drog med sonen Jonathan sto ei 169 cm lang kveite som viste seg å vera 72 kilo.

Kokken Frank Bruarøy hos Havnechefen kjøpte heile fisken.

– Eg liker sjølv både å fiska og dykka, og gler meg på vegne av Frode og Jonathan over fangsten. Då eg såg at dei ville selja så slo eg til, både fordi det er lokal fangst og fordi kveite er ein av dei fiskane eg har laga flest variantar av.

– Ikkje eit ondt ord om røykt kveite, men kjøtet har potensiale til langt meir enn kva folk tradisjonelt lager til. Mange seier at kveitekjøtet er best om fisken ikkje er tyngre enn 30-40 kilo, men no har eg testa både steikt og sjølv-røykt, og dette skal vi klara å laga mykje godt av.

Fiskaren skal få smaka

Etter at Midtsiden besøkte fiskarane blei kveita tatt med på vekta på båten Molly. Det viste seg at den vog 72 kilo.

– Det blir mange middagsporsjonar. Har du sjanse til å få selt alt?

– Det blir dagens fisk nokre dagar fram mot helga, men delar av fisken blir frosen ned. Eg har blant anna lovd fiskarane ein middag når Frode om eit par veker er tilbake frå jobb, og det skal bli sjanse også for andre å smaka kveita frå Skorpo seinare i haust òg.