Kaptein Karl Robert Røttingen i ein av thrusterane. No kan han snart koma seg på havet igjen. (Privat foto)

Kaptein Karl Robert på sjøen med nytt polarskip

Etter fire år på land ved verftet i Italia kunne Røttingen endeleg testa milliard-skipet «Kronprins Haakon».

image
image
image
image
image
image
image
Av: Kjetil Vasby Bruarøy

Han blei involvert allereie i 2012, har følgd prosjektet sidan 2013 og «då det kom pengar på statsbudsjettet skjedde det fort».

Den komande kapteinen Karl Robert Røttingen (42) frå Os har vore med og leia prosjektet, ved verftet i La Spezia ved den italienske storbyen Genova.

– Eg har vore tre veker på og éi veke av, heime hos ein tolmodig familie i Øyane. Det har blitt lite tid heime og mange år på land, no var det godt å koma seg på sjøen og fantastisk å få prøva skipet, seier Karl Robert til Midtsiden.

Sysla.no omtalte den første prøvekøyringa torsdag.

Havforskningsinstituttet sitt nye polarskip «Kronprins Haakon» er 100 meter langt, har den største akustiske sensorpakken på noko forskingsfartøy nokosinne, og har ei kostnadsramme på 1,4 milliardar kroner.

– Det var fantastisk å manøvrera båten, å oppleva eigenskapane som ingeniørane har skildra! Eg er imponert, seier kapteinen.

I reieri med tre onklar

Røttingen køyrde hurtigbåt før han byrja å jobba for Havforskningsinstituttet, og segla for Kystvakten før han kom tilbake til havforskinga og var med gamle Fridtjof Nansen langs kysten av Afrika.

Les òg: Nye Nansen innom Bjørnafjorden

«Kronprins Haakon» er eigd av Norsk Polarinstitutt, med Universitetet i Tromsø som største brukar.

Røttingen er i same reieri som onklane, søskenflokken John Gerhard, Henning og Asbjørn Aasen. To av onklane er skipper på andre forskingsfartøy, den tredje er notbas.

– Det er eit eventyr å jobba for Havforskningsinstituttet, å segla både i polare strøk, utanfor Afrika, til India og Pakistan. Nokre funn er mest interessante for forskarane, men mange funn er også spennande for alle om bord.

– Er det normalt at ein kaptein blir sett i land for å koordinera eit byggeprosjekt som dette?

– Nei, det er nok ikkje det, men det blei naturleg likevel. Eg var i land på eit anna prosjekt, med tryggleiksstyring, og så blei eg ein av fleire som var med i ein tidleg fase i prosjekteringa av Kronprins Haakon. Der var eg blant anna saman med ein maskinist som pensjonerte seg, og då blei eg den raude tråden som kunne vidarebringa hans kunnskap til neste trinn i prosessen.

• Les òg: Trond Bruarøy heimom med verdas kraftigaste (2012)

Røttingen var først prosjektkaptein, så byggeleiar. Han understreker at han ikkje har vore åleine i prosjektleinga, men del av eit sterkt team.

– Grunna skipet sin kompleksitet har vi eit stort team. Eg har med meg blant andre skipper Johnny Peder Hansen frå Tromsø, maskinsjefane Leif Inge Grotle frå Bømlo og Kjell Hufthammer frå Austevoll.

Bryter isen

«Kronsprins Haakon» er av Rolls-Royce NVC-design og skipet er «72 % norsk», med ein serie av norske leverandørar som: Bergen Diesel, Rolls-Royce (hovudmotor, thrusters), Seatronics (vinsj og kran), Kongsberg (DP-system/bru/akustikk, ROV), Harding og Viking (livbåtar og flåter), Marine Montering (interiør) og Novenco (Hvac).

Det isbrytande forskingsskipet er ikkje heilt ferdig, men skal etter planen heim til Noreg i oktober for nokre månadar med testkøyring av båt og utstyr. Så skal den til isen i nord i tre år, mens det fjerde året blir i Antarktis.

– Eg gler meg til å prøva han i isen, med Rolls-Royce sitt nye isbrytar-design, berre testa på to tidlegare skip, med ein funksjon som gjer at isen blir pressa ut til sidene etter at den er broten. Sjå video på Sysla.no.

– Båten er elles fullspekka med utstyr, frå vitenskapeleg utstyr, ROV, dykkerfasilitetar og trykkammer, landingsdekk og hangar til to helikopter. Ved sidan av oseanografi og marinbiologi kan vi ta geologiske og seismiske målingar og prøvar, også med boring.

– Det blir ei spennande tid framover, men no gler eg meg òg til å koma heim og kjøla meg ned om halvanna veke, etter ein periode med hetebølge i Italia, seier Karl «Roberto» Røttingen.

Tekniske detaljar

Lengde (LOA): 100,0m
Breidde: 21,0m
Djupstikk: 8,5m
Gross tonnage 10.900T
Hestekrefter: 13.500

• Innreiing for 55 personar i 38 lugarar (15-17 mannskap).
• 15 laboratorium
• Auditorium (50 stolar)
• Plass til 40 passasjerar
• Maks «tokt rekkevidde» 15.000 nautiske mil
• Kapasitet 65 dagar ved tokt fart (utan bunkring)

Noko av utstyret:
Helikopterdekk er dimensjonert for NH-90 (Kystvakt) og Super Puma (Svalbard SAR).
5 kranar (frå 3 til 12 tonn)
158 tonn bollard pull (200.000 tonn)
Firefighting class 1 compliant
Simrad EM710 Mk-II Multistråle Ekkolodd (djupne inntil 2800 m)
Simrad EM302 Multistråle ekkolodd (djupneområde 10-7000 m)
Ægir ROV, finansiert av NFR (Norsk Forskningsråd)

Merkedatoar:
Kontraktsignatur: 19/12-2013
Stålkutting: 15/6-2015
Sjøsetjing: 1/3-2017    
Overfart til Noreg: oktober 2017 (T.B.D.)    
Levering: Overtaking 2017 (T.B.D.)

Fleire saker

bilde-midtsiden

Lite stemte for Os

17. oktober 2017

Det stemte verken framover eller bakover då Os møtte Fyllingen.

bilde-midtsiden

Bil i fjellveggen

17. oktober 2017

Ein mann er køyrd til legevakt etter ulykke nær Nordvik.