– Klart eg er stolt

Andre episode av Norske Talenter blir i kveld sendt på lufta, med blant anna klipp frå innspelinga i Oseana.

– I kveld får du sjå alt frå magi som tek pusten frå dommarane til opplysningssang som går inn i historiebøkene. Kveldens talenter byr på spenning og overraskingar, heiter det i programomtalen.

Halvt osing

Ein av kveldens deltakarar er My Therese Falch Lepsøy (15) frå Bergen, men med sterke røter til Osbygda.

– Ho er fødd og har vakse opp i Bergen, men har no vore mykje på Os òg. Ikkje minst i feriane når vi har vore ute på hytta på Gjeterøya, fortel bestefar John Lepsøy.

Blei gripen

John fortel at My Therese har vore elev ved Bergen Kulturskule i fleire år, og at han hatt gleden av å sjå ho opptre, både aleine og med dei andre elevane på skulen. Bestefar var sjølvsagt til stades og heia, då ho song i Oseana.

– Det var veldig rørande. Det er lett å bli gripen når ein har barnebarn som gjer det så godt. Samstundes var det jo spennande å sjå om ho gjekk vidare, seier ein stolt John Lepsøy som ikkje vil røpe korleis det går med sonedottera i kveld.

My Therese Falch Lepsøy syng opera i kveldens program.