Laks lokka Petter på elva

Nils H. Sylta fekk ein laks på 4,5 kilo i opningsnatta og Tor Åge Thuen fekk to på 5,5 og 6,5 kilo, alle i Kremretten.

Men også i fossen i Kvernhushølen er det fisk å få, Petter Spjell Røttingen sette personleg rekord når det kjem til storleik då han litt før klokka 14 i dag fekk ein laks på 8,5 kilo på land.

– Eg har tatt større fisk, men ikkje i Oselvo, seier Petter.

Den gamle rekorden hans var på 7,5 kilo.

Hamna i elva

Etter å ha hatt fisken på kroken på ein sluk skifta Petter til makk. Så hogg han i og ein kamp på rundt eit kvarter starta.

– Leif Juvik hadde nettopp gått, så eg blei ståande åleine.

Då han fekk laksen opp i fjøra nedanfor fossen, og vassa uti for å få den på land, skjedde ting plutseleg litt fort.

– Laksen sprella og brått såg eg at kroken var ut av kjeften på han.

Petter tok tak og kasta laksen på land, men glei samtidg og blei sjølv sprellande som ei laks ei lita stund.

– Eg gjekk under med hovudet og alt, så det var berre til å ta fisken med seg og koma seg heim, ler Petter, nøgd med å ha 8,5 kilo med det som ser ut som villaks i frysen.