Livleg bondetreff på Øyro

Bildeserie:

1 av 5

Laurdag var det Bondens Dag i Os sentrum. Dagen starta tradisjon tru med gratis frukost på Torget.

– Det kom godt med folk. Vi kokte 120 egg og alt gjekk med, fortel Olav Botnevik.

– Heldigvis kom det ikkje regn før på ettermiddagen heller, så vi hadde ein tørr, varm og fin dag på Øyro og under aktivitetane på Kyrkjeflaten.

Tre barnehagar dyrka seg fram til gardsbesøk

Under årets Vårslepp i Os sentrum i mai stilte bondelaget opp og delte ut settepoteter.

– Det er gratis å delta og den som dyrkar den beste åkeren i sin tildelte stamp innan Bondens Dag på seinsommaren vinn konkurransen, forklarte Botnevik.

Seks barnehagar leverte inn stampen sin og gardsbesøk var premie til desse vinnarane i dei tre kategoriane:

1. Flest poteter: Søre Øyane Naturbarnehage
2. Flest kilo med poteter: Varhaug Barnehage
3. Den støre poteta: Os Barnehage (300 g)

Angelica vann med kalven «Mathias»

Saman med ponniriding og nærkontakt med dyr frå gardane i Os høyrer kalvesjå med under Bondens Dag.

Fem ungar stilte opp og presenterte kvar sin kalv og Angelica Gjerde vann med kalven «Mathias».

– Ho hadde så godt lag med kalven, dommar Eivind Moberg, legg vekt på dette med harmoni.

Reint treff – med skit

I år var det også høneskitebingo igjen, og konkurransen var så populær at det gjekk til ekstraomgang.

– Hønene var passeleg raske med å skita i år, så det blei litt spennande. Første året var dei raske, vi fekk så vidt sleppt dei nedpå bingobrettet.

– Men siste nummer landa på streken, så då måtte vi venta på neste, at vi fekk eit reint treff, ler Olav.