Meiner kvinna blei drept med kniv

Klokka 18.40 søndag kveld ringte ein mann i 40-åra til politiet og sa at han hadde drept ei kvinne.

Mannen blei pågripen utan dramatikk.

Samtidig rykte politiet ut til ein bustad i Lyseklostervegen. I oppkøyrsla fann dei ei død kvinne i slutten av 30-åra.

Mannen sat i avhøyr til klokka 2 natt til måndag og erkjenner straffeskyld.

Har kontroll på våpenet

Midtsiden har ikkje lykkast i å nå påtaleansvarleg Inger-Lise Høyland, men ifølgje BT.no, som viser til NRK, seier politiet at kvinna truleg blei drept med kniv.

Politiet har kontroll på ein kniv dei meiner er drapsvåpenet.

– Ei tragisk sak for alle involverte

Sikta og kvinna har felles born, men er fråseparert.

– Dette er ei tragisk sak for alle involverte. Klienten min gjennomførte avhøyret greit, men tar det sjølvsagt veldig tungt, seier mannen sin forsvarar, advokat Jostein Alvheim til BT.