Mopedistar slapp unna med åtvaring

Hesteløypa har blitt svært trafikkert med turgåarar og mosjonistar etter at Knutabruo opna i oktober i fjor.

I november oppsto det ei dramatisk ulykke då to hestar blei skremt av turgåar med paraply.

I går kunne det gått endå verre.

– I 21-tida fekk vi melding om at nokon køyrde moped og ATV i løypa, fortel lensmann Oddbjørn Dyrdal.

Politiet rykte ut og møtte dei fire mc-førarane, som var frå 16 til 18 år gamle.

Risikerer store bøter

– Eg reknar med at vi definerer dette området som utmark, og ulovleg motorisert ferdsel i utmark kan føra til ganske høge bøter, seier Dyrdal.

Ungdomane som i går blei tatt på to og fire hjul slapp billig unna.

– Dei fekk ei åtvaring denne gong, men om nokon blir tatt for tilsvarande seinare så vil dei bli meldt, forsikrar lensmannen.