Moteshow med noko attåt

Bildeserie:

1 av 18

– Eg smiler frå øyra til øyra, seier Laila Moberg frå sentrumsforeininga etter at arrangementet var over.

Etter ein tre timar lang reklame for Os sentrum, fylt med moter, underhaldning og foredrag undervegs, er ho strålande nøgd og synest alt blei minst like bra som venta.

Kunne selt dobbelt så mange billettar

Tidlegare har sentrumsforeningen invitert til moteshow i Kløvertun, noko som har vore veldig populært blant innbyggjarane i Os. I går var det fullt show for ein fullsett Oseana-sal.

Denne gong ville dei dra det litt lengre, Laila fortel at dei sikta mot stjernene.

– Vi ville bruka Oseana fordi det er betre plass, men òg fordi det er jo kulturhuset vårt, og det må vi ta i bruk.

Oseana har plass til dobbelt så mange publikummarar som Kløvertun har, men det blei ikkje stort nok det heller.

– Det har vore enorm pågang på billettar og vi kunne nok fylt salen endå ein gong.

– Barbra er drivande dyktig

Ein stor produksjon blei sett i gong i august, og Laila fortel at dei har jobba intenst med å få det til.

Onsdag var den store kvelden og publikum blei leia gjennom eit fleire timar langt arrangement av konferansier Barbra Røttingen, som hadde fått seg ein eigen «Dorthe Skappel-krok».

– Det var naturleg å spørja Barbra, ho har lang erfaring med å halda foredrag, og vi visste kor drivande dyktig ho er.

Badekar på scenen

Den raude tråden i framsyninga var «Adam» og «Eva», spelt av Jan Helge Kordts og Linda Nytræ, og deira veg frå første blikk på Solsiden og påfølgande frieri til råd om lån til bustad og planar om å starta opp ei eigen bedrift i sentrum.

– Eg er veldig takksam for at Linda og Helge tok seg tid til å bli med midt i stria med øving til revy.

Til og med eit badekar fekk seg ein runde på catwalken denne kvelden.

– Eg hadde ein draum om å ha eit badekar på scenen, det er viktig å visa mangfaldet vi har i sentrum.

Populært gåvedryss

Torstein Hatlevik frå Haaheim Gaard fortalte om sin visjon på Tysnes medan ordførar Terje Søviknes og prosjektleiar Fredrik Seliussen viste publikum planane for «Liv på Øyro».

C.J. Marvin, pianist på Solsiden, sto saman med gitarist Hans Marius Johnsen for musikken.

– Vi hadde ei overrasking til publikum då Runar Drønen gav ein smakebete av kva revyen på Søre Neset har å by på til helga, då blei det god latter i salen, seier Laila.

Det blei gåvedryss der 60 heldige gjekk heim med gåver frå butikkane i sentrum, alt frå gåvekort, klær, fiskestang – til og med ein diamantring blei gitt vekk!

Etter at showet var over kunne ein få seg ein smaksprøve av det Oseana kafé og restaurant har å by på, og kikka på dei ulike varene som var utstilt i foajeen.

Eksklusive tilbod

Publikum fekk også med seg eit verdibrev dei kan bruka på butikkane i sentrum dei neste tre dagane, med tilbud som er eksklusiv for dei.

– Vi ville gje noko tilbake til alle dei som har tatt seg bryet med å kjøpa billett, og eg håpar dei bruker det.

– Tilbakemeldingane har vore overveldande, det er veldig mange som har takka og har sagt dei er imponert over kva vi har fått til.

– Kva vi gjer neste gong veit vi ikkje enno, men første gong i Oseana var veldig kjekk!