No står desse laksane i kø

Bildeserie:

1 av 4

I kveld er det ei veke sidan sesongen for laksefiske starta i svært låg vassføring i Oselvo.

Framleis er Raimondas Molnikas sin tert (laks under 3 kg) på 2,8 kilo, tatt i Kremretten 15. juni, det nærmaste fiskarane har kome årets første laks.

– Det lågaste vi har målt i denne perioden er 230 liter i sekundet. Det blir som om 25 mann står med kvar si bøtte og tømer ned elva, seier Roald Helle og ler.

1,5 døgn «forseinking»

Måndag kom regnet, etter fleire tørre veker i Os. Det har førebels ikkje ført til særleg høgare elv.

Helle er formann i Osvassdragets forvaltningslag og seier fleire har ringt han måndag med spørsmål om vassføring.

– Det skal litt til, og det tar noko tid, før Oselvo får effekt av regnet. Jorda er tørr og skal mettast, så skal vatnet koma seg ned mot Os.

– Det tar normalt eit halvt døgn før det kjem utslag på målaren på Røykenes og yttarlegare eit døgn før Oselvo får merkbar auka vasstand, forklarer han.

Vassføringa på Røykenes ser du på nve.no.

Kan gje godt fiske

Måndag kveld sto det mykje laks i elvemunningen i Os hamn, to av stimane hadde begge over 15 fisk i ulik storleik.

– Eg har ikkje høyrd om at noko av fisken ser ut som oppdrettslaks, så dette lovar bra.

Helle etterlyste tips om oppdrettslaks etter rømming 24. mai.

– Det skal nok ikkje så mykje vatn til før fiske går opp elva, for den har venta ei stund no og går nok så snart den har sjanse.

Det er meldt opphaldsvêr mesteparten av dagen i dag og heile onsdag, men meir nedbør torsdag og fredag.

Midtsiden samleside: Jakt og fiske