Nore Neset til talent-finale på Hamar

Bildeserie:

1 av 3

Hovudbilde, bak frå venstre: Johannes Lie, Liam Askvik, Mathias Sørstrønen, Peter Armstrong, Markus Hufthammer, Håkon Olsen, Fredrik Solbakken, Lars Hadler-Olsen, Eirik Spangelo Haga, Pelle Stoltenberg, Martin Borgen og Marius Hevrøy. Framme frå venstre: Endre Saltnes, Brede Søfteland, Martin Sofron Storvik Nilsen, Matias Røttingen og Benjamin Nagelsen-Balland.

I helga gjekk årets Hamar Talentcup, med gutelag frå norske toppklubbar saman med inviterte lag frå heile Noreg, av stabelen på Hamar.

Frå Osbygda stilte det to lag, Os G16 og Nore Neset G15, begge på nivå 1.

– Os gjorde det skarpt og kom til semifinale, der dei tapte for laget som vann klassen, vi gjorde det òg bra, og kom heilt til finalen, fortel Nore Neset-trenar Kenneth Hufthammer.

Uavgjort mot noregsmeisteren

Norenesingane fekk ein god start og vann 8-1 over Clausenengen frå Kristiansund i første kamp.

I andre innleiande runde blei det 1-1 mot Lyn, som i år vann Adidas Cup (uoffisielt NM).

– 1-1 var greit resultat, men hadde vi spelt like bra som i første kamp så hadde vi vunne denne òg.

Med 2-0 over Holeværingen i siste innleiande blei det 2. plass i pulja grunna målforskjell.

Til finale med fin fotball

Søndagen var det sluttspel og i første runde i A-sluttspelet var det kamp mot Holmlia.

– Dette var nokre ruvande 15-åringar, viss ikkje eg hugsar feil så hadde tre av dei heilskjegg.

Nore Neset vann 5-1. I kvartfinalen mot Bodø/Glimt blei det 4-0, mot Moss i semifinalen vann Nore Neset 1-0.

– Vi spelte veldig fin fotball heile dagen. Mot Moss hadde vi ein ute i 5 minutt grunna gult kort. Likevel hadde vi ballen mest desse fem minutta.

Finalen endte med 2-0-tap for Heimdal.

– Det gror godt i bygda

Nore Neset har 60/40 med 2001- og 2000-spelarar og skulle i utgangspunktet spela G16 nivå 2.

– Arrangøren spurde om vi ikkje heller ville spela G15 nivå 1, trass at vi hadde litt mange overårige, og det takka vi ja til.

– Vi har frå før gjeve frå oss 6 gode spelarar til Os, og det er ein glede å sjå at det gror så godt i fleire klubbar, og at våre gutar framleis er sterke nok til å presera på dette nivået.

Nore Neset G15 har blant anna tatt 3. plass i Lagunen Cup i fjor haust og 3. plass i Varegg Cup i vår.