Noregsrekord og NM-gull til Ariel

Ariel Braathen (16) er framleis i oppkøyring, likevel gjekk det lett og fort på 50 meter bryst i dag.

Les òg: Ariel si siste ferd mot OL

Med 31,27 i finalen blei det NM-gull for senior og ny norsk juniorrekord .

– Eg kjente at det gjekk fort allereie i forsøket, men måtte justera litt på teknikken for å få den til å sitja skikkeleg, seier Ariel til Midtsiden.

I forsøket var ho òg best med tida 31,51. I finalen blei det trippel-Bergen i finalen med sølv til Ingalill Naustvik og bronse til Elida Hole.

Spent på 200-meteren

Det er kanskje tidene på 100- og 200-meteren Ariel er mest spent på denne helga, då dette også er distansane ho prøver å ta A-kravet til OL på i løpet av våren.

Krava kan ho berre ta på langbane, men tidene på kortbane no i helga gjev ein god peikepinn før ho byrjar å toppa fomen inn mot Stockholm Open i slutten av mars.

– Eg er alltid mest nervøs før 200 meter, men eg føler at det å vera spent hjelper meg, så eg gler meg veldig!

Ariel svømmer 200 meter og truleg stafett laurdag, mens 100-meteren går søndag.

Ariel sin ferske pers på 100 meter:
1.10,24 (B-kravet er på 1.10,22, A-kravet på 1.07,85)

Ariel sin ferske pers på 200 meter:
2.31,96 (B-kravet er på 2.32,08, A-kravet på 2.26,94)