Nytt skjenkeløyve til Engeline

Dei nye drivarane av Engeline, som i mars oppgraderte uteplassen og tilbodet med pub på kveldstid, har skjenka på førre drivar sitt løyve fram til førre helg.

– Vi har søkt om, og fått, eige løyve, seier Svein Marcelius.

Eit samstemt formannskap godkjente søknaden 16. mai.

Frå klokka 2 til 1

Førre drivar hadde skjenking til klokka 2 om natta, noko brørne Marcelius med mannskap har hatt glede av.

Men søknaden som no er innvilga gir løyve til klokka 1 natt til laurdag og søndag, og til klokka 23 dei fem andre kveldane i veka.

Løyvet til klokka eitt gjeld også utandørs.

Har sendt ny søknad

– Det er ikkje eg som har styrt med søknaden, så eg kjenner ikkje detaljane, men dette var ein glipp frå vår side, seier Svein.

Søknad om å endra løyvet til klokka 2 er sendt. Engeline har bedt om skjenking til klokka 2 alle dagar i veka, for å unngå problematikken fleire utestadar har hatt natt til helligdagar, der enkelte har måtta gje seg tidleg sjølv om folk flest har oppfatta kvelden som helg.

– Pubkveldane er ein viktig del av drifta vår, og vi ønskjer å halda fram med skjenking til to. Fram til ny søknad er behandla og innvilga, held vi ope som vanleg, men må dessverre gi oss klokka eitt.