Omsetnaden held fram med å auka

Desember er over og julemånaden blei som vanleg årets beste, også ved Amfisenteret.

Julehandelen blei på 75 millionar kroner, den samla årsomsetnaden til butikkane på senteret blei på over 524 millionar kroner.

– Julehandelen auka frå 70 til 75, totalt for året auka vi frå 509 i 2013 til nesten 525 millionar kroner i 2014, fortel senterleiar Anne Kristine Tøsdal.

Nesten 5 prosent opp

Veksten var på 3,01 prosent, mot 3,18 prosent frå 2012 til 2013.

– Dei fleste butikkane hadde ei auke i fjor. 32 opplevde vekst, mellom 5 og 10 hadde nedgang. Nokre var nye og har ikkje samanliknbart grunnlag.

Nokre lokale har stått tomme nokre månadar. Om vi berre ser på butikkane som er samanliknbare, altså dei som har vore der begge driftsåra, er veksten høgare.

– Dei butikkane som var opne i heile 2013 og 2014 vaks frå 404 til 424, altså 4,89 prosent.

Over 10.000 besøk på éin dag

Amfi Os fekk i november installert kundeteljarar i dørene på senteret.

– Det er nokre år sidan sist vi hadde dette systemet, men no er det på plass igjen og vi kan telja besøk frå dag til dag, time til time.

Dei to siste dagane før jul var dei travlaste, 22. desember med flest besøk, heile 10.479 personar var innom senteret to dagar før jul.

– Vi gler oss naturlegvis over veksten og ser fram til å få fullt sentert igjen. No ryddar vi ut jula, også av lokalet Casa hadde, og i neste veke byrjar Ditt Apotek å innreia butikken som skal opna i februar, seier Tøsdal nøgd.