Opna restauranten for å hjelpa

Bildeserie:

1 av 3

– Vi gjer ikkje dette for å få publisitet, eg har ikkje annan kommentar enn «god jul!» seier innehavar David Orahim då Midtsiden besøkte Halhjem Kjøkken laurdag ettermiddag.

Gjestar under julemiddagen hadde tipsa lokalavisa om det varmhjarta tilbodet med gratis julefest med full servering; pinnekjøtt, ribbe, riskrem og koldtbord med ulike julepålegg.

– Eg har ikkje noko avansert forhold til religion, men eg fryktar gud. Det gjeld å koma i balanse før jul, seier han med glimt i auget.

Spreidde glede blant unge og eldre

Sambuar og medeigar Betty Wilhelmsen forklarer at David sitt initiativ blei følgt opp med ein telefon til Os kommune og til ulike som jobbar frivillig med å hjelpa andre. Dei fekk hjelp til å senda invitasjonar til dei rette, osingar som vil setja ekstra pris på å få spandert på seg ein skikkeleg julefest, anten dei er einsam eller har eit noko redusert julebudsjett.

– Det var over 100 påmeldte og sikker rundt 80 som kom. Det har vore god stemning og det har vore ekstra kjekt å sjå kor glade ungane var då nissen kom.

– Eg blei heilt rørt då eg såg kor glade ungane blei for å få gåve, fortel David sin son, Jerry.

Nissen hadde med seg presangar, ikkje snop, og Betty beit seg spesielt merke i éin av kommentarane frå ungane.

– «Ein pakke! Og så eg som har ein heime òg, no har eg to!» jubla den eine unge gjesten. Eg er vant med å sjå ungar som ikkje rekk å opna alt dei får på julaftan, dette gjorde inntrykk. Denne gleda over éin pakke, det er jo sånn det skal vera, seier Betty.

– Eit fantastsk initiativ

Ein av gjestane, Anne-Lise, seier ho har hatt ein strålande kveld.

– For det første har eg ikkje vore her på 30 år, for det andre har det vore så god mat og god stemning, synest ho.

Veronika Wilhelmsen, som blei invitert med av fadderbornet Regina med familie, er overvelda.

– Det har vore så mange takksame ansikt å sjå, og ekstra kjekt å laga ein julefest i ein fin restaurant i forhold til for eksempel ein gymsal.

Den største gleda du kan ha ...

Den svenske kokken er ikkje snauare enn at han innrømmer at han også gjer dette for å gleda seg sjølv.

– Dette er ikkje berre for å gleda andre, dette er for min eigen del. Eg ville ha denne gode kjensla før vi no tar juleferie. Det kjennest godt å gleda andre, seier David.

Halhjem Kjøkken har i dag sin siste opningsdag før jul, før dei tar fri for å feira med «nære og kjære», som han sjølv seier.