Eline Lundervold og Camilla Koldal bruker eigne born, Christian og Aria, som ekstra last på enkelte øvingar. (Foto: Kjetil Vasby Bruarøy)

På trening med nybakt mamma

Her kan du amma, skifta bleie eller bruka babyen din som «vektstang».

image
image
image
image
image
image
Av: Kjetil Vasby Bruarøy

– Det er eit fint tilbod for oss som har små. Det er god trening samtidig som vi ikkje er avhengige av barnevakt eller at ungane søv, seier Camilla Koldal.

Tysdag formiddag har ho dottera Aria med seg på trening.

– Det er godt å koma i gang med treninga igjen etter fødselen, dessutan har ungane det kjekt òg, seier Eline Lundervold, på trening med sonen Christian.

Lågterskel med låg musikk

Charlotte Pucci Olsen er instruktør for mammatreninga, som er kvar tysdag formiddag i Kolskogen.

– Dei yngste babyane er berre nokre få veker gamle. Øvingane er tilpassa kvinner som nyleg har fødd, med varsame øvingar for bekkenet og styrking av kjernemuskulatur.

Mens mødrene trener ligg nokre og søv, andre ligg og leikar eller klatrar litt på mor. På enkelte øvingar passar det bra å ha babyen i armane, sjølv om øvinga blir litt tyngre. Innimellom er det éin som vil ha trøyst mens ein annan treng ny bleie eller ein slurk med mjølk.

– Her er alt lagt til rette for at mødre skal kunna ta ungane med på trening. Musikken er låg og alle er i same situasjon.

Del av 24Fitclub

24Fitmoms er ein del av 24Fitclub Os, som har hatt lokale i Kolskogen sidan våren 2014.

– Vi har fire økter i veka her i Kolskogen, vanlegvis med rundt 20 deltakarar. I tillegg har vi økter utandørs, både på Kuventræ og med felles motbakketrening, fortel Eivind Hodneland.

24Fitclub er gratis trening kombinert med kosthaldsvegleiing. Det heile blir drive av sjølvstendige Herbalife-distributørar, men det er ingen kjøpsplikt av ernæringstilskot i samband med treninga.

– 24Fitmoms blei starta av Solrun Laastad. Då ho no byrja i jobb igjen er vi glade for at det passa for Charlotte å overta. Dette er eit tilbod som er populært for dei som er heime med små, som når ungane byrjar i barnehage går over til andre treningsgrupper, seier Hodneland.