Pensjonistar hjelper barn som les

Ein lyttevenn er ein frivillig vaksen som lyttar til barn som les, og hjelper barnet å forstå nye ord og samanhengen i teksten. Lesinga og lyttinga føregår på skulen i skuletida, ein til to timar i veka.

Søre Øyane barneskule er første skule ut med lyttevenner i Os. Dei siste to vekene har sju pensjonistar lytta til 60 andre- tredje - og fjerdeklassingar lese. Erfaringane så langt er berre positive.

Byggjer bru mellom generasjonar

Lyttevenn-prosjektet starta i Vest-Agder i 2010. Formålet er å bygge bru mellom generasjonar, og stimulere og motivere til lesing hos barn i alderen sju til ni år. Lyttevenner skal ikkje lære barna å lese. Dei skal vere gode lyttarar, vere positive og oppmuntrande, og hjelpe barnet å forstå samanhengar og meining i tekst dersom det står fast.

Å snakke om det ein har lese, styrkar forståinga. Difor er det fint om lyttevennen og barnet snakkar saman om kva som står i teksten, kva ord betyr og kva teksten handlar om.

- Å ha ein lyttevenn gir barn verdifull lesetrening. Å vere lyttevenn gir eldre moglegheit til å dele av kunnskap, tålmod og interesse, seier rektor ved Søre Øyane barneskule, Gunnhild Hansen i ei pressemelding.

Herlege samtaler

Ho høyrde om Lyttevenn-prosjektet gjennom fagsjef for skule og barnehage i Os kommune, Per Olav Sørås, og blei fast bestemt på å få det til på sin skule.

- Elevane gler seg og førebur seg ekstra godt. Lyttinga og lesinga opnar for herlege samtaler om stort og smått, og vennskap på tvers av generasjonar.