Plantasjen doblar på tivolitomta

I sommar blei Os Hagesenter selt til Plantasjen. Familien Lyssand, som har utvida kraftig, eig framleis huset, men driftsselskapet har gått frå Os Hagesenter, som var frittståande medlem av Hageland-kjeden, til Nordens største hagekjede, Plantasjen.

– Alle vi som jobba i Os Hagesenter er med vidare, seier Ida Mäkenen.

1. oktober overtok Plantasjen det utvida lokalet, 17. november er det opning.

Ny sjef

Ida har jobba i hagesenteret sidan det opna i 2003, dei siste åra som butikksjef. Med plantasjen følgte ny dagleg leiar, Men Ida held fram som NK.

Ny sjef ved hagesenteret på tivolitomta, som området blei kalla før senteret kom, er André Egebakken.

Egebakken jobba ved Plantasjen på Birkeland i fem år før han no overtok på Os.

Nesten dobling

Medan Os Hagesenter på seinsommaren selte ut varelageret sitt har byggearbeidet med utviding gått for fullt.

Bygningen er no utvida frå tre til fem «toppar».

I tillegg til dei fem store drivhusa har senteret fått tak over 1000 kvadratmeter av utearealet.

– Eit sånt overbygd uteareal er det ikkje alle hagesenter som har, dette blir ein stor fordel for oss og kundane våre, seier Egebakken.

– No i starten kjem det til å gå mest i ved og, om ikkje så lenge, juletre, på uteavdelinga.

Ny inngang - nytt kaldthus

Dei to nye toppane husar «kaldthuset» til Plantasjen. Det førre «kaldthuset» blir no lager for sjølvplukk, så du sjølv kan gå og henta partyteltet eller hagestolane du har funne i utstillinga.

– Vi bygger også litt om i fasaden og flyttar inngangspartiet til hjørnet nærmast vegen og krysset, fortel butikksjefen.

– Det blir eit moderne og flott hagesenter når vi blir ferdig, lover han.

Nye og større varegrupper

Plantasjen innreier hagesenteret med fleire nye avdelinger.

– Vi får blant anna ei stor avdeling med fôr og utstyr til hund og katt, det er heilt ny varegruppe for dette hagesenteret. Her har vi tre kjente leverandørar av kvalitetsvarer til dyr på plass.

Nokre varegrupper blir kraftig utvida.

– Det er litt styrt av sesong, men varer som snøfresarar, høgtrykksspylarar og grasklipparar blir å finna i heilt annan skala enn før, seier André Egebakken to veker før opning.