– Positivt at det blir ein debatt

«Kan røyster kjøpast?» spør Gisle Hesjedal (Ap) i eit lesarinnlegg om Susanne Sperrevik (H), som gir vekk politikar-honoraret sitt, og meir til.

– Eg kan lova deg at eg ikkje hadde nokon baktanke med gåva, svarer Susanne Sperrevik.

– Då honoraret kom tenkte eg at eg ville gje det vekk, eg ser på mitt politiske engasjement som hobby, som frivillig arbeid. At det blei litt fleire kroner i denne omgang var fordi det var vanskeleg å velja mellom dei gode søkjarane.

– Men er det ikkje fare for at denne typer gåver kan ha ein effekt som tilsvarar det å kjøpa seg stemmer?

– Det er mange måtar å få stort nettverk og mange venar på. Eitt eksempel er frivillig arbeid, slik Gisle Hesjedal fortel at han har utført hundrevis av timar med gratisarbeid.

– Tid kan tilsvara pengar. Eg har ikkje tid til å trena eit handballag, men i denne omgang hadde eg høve å gje vekk litt pengar. Skal eldsjeler som Gisle Hesjedal, Tore Kleppe og Eirik André Hesthamar slutta å engasjera seg fordi dei kan bli betre likt, noko som igjen kan gi fleire røyster? spør Sperrevik, som legg til at, om det viser seg å vera ugreit å gje vekk pengegåver, så vil ho ikkje halda fram med det.

– Er rekneskapen til Hesjedal rett, at du kan koma til å gje vekk 160.000 kroner i løpet av denne kommunestyreperioden?

– Nei. At vi la litt ekstra pengar i potten denne gong, og gav til fire ulike, treng ikkje bety at vi gjer det neste gong. Poenget var at eg ville gje vekk politikar-honoraret mitt.

– Ville at det skulle vera ope

Hesjedal stussar òg over at Sperrevik valte å ta imot søknadar om støtte utelukkande i kommentarfeltet på Facebook.

– Det var tre årsaker til dette, eg ville ha tips, eg ville at forslaga skulle koma inn opne for alle og eg ville unngå å bli «bombardert» av telefonar, tekstmeldingar og epostar.

Birthe Eriksen ønskjer ikkje å kommentera

Birthe Eriksen, advokat, politikar og profilert forfattar og foredragshaldar innen korrpusjon og varsling, hadde i april seminar i Os i regi av Os Høyre.

Eriksen seier ho ikkje kan kommentera denne konkrete saka.

– Eg har lest omtalen og lesarinnlegget og eg har gjeve råd til Os Høyre i saka, derfor ser eg meg som inhabil.

– Men eg kan seia at det er positivt at det kjem ein open debatt om dette, ein debatt eg håper det kjem noko positivt ut av.