Ramo skåra i Tyrkia

Søndag reiste A-laget til Lysekloster på treningsleir i den tyrkiske byen Side.

Torsdag spelte dei den første av to planlagte treningskampar. Motstandar var SC Brühl frå den svietsiske byen ST Gallen.

SC Brühl - Lysekloster 2-1 (1-0)
Målskårar, Lysekloster: Ramo Racic

– SC Brühl speler på tredje høgaste nivå i Sveits, ein divisjon som berre har éi avdeling, så det var lagt til rette for god motstand, seier dagleg leiar i Lysekloster IL, Ørjan Sandal.

Sandal er sjølv ikkje med på turen, men har fått rapport frå trenar Torbjørn Birkelund.

– Etter kva eg har forstått presterte vi greit, seier Sandal.

Reisebrev med kamprapport

Spelar Daniel Kalstad går på krykker, men er med på turen og skriver reisebrev dag for dag på lysekloster.no.

- Vi var ikkje tøffe nok i duellane i starten på kampen, i tillegg var vi litt utålmodige i oppspelfasen, så det blei nokre stygge brot imot.

– Men vi kom inn i rytmen etterkvart og fekk til nokre fine kombinasjoner, seier Torbjørn til eigen heimeside.

På lysekloster.no kan du sjå bilde og lesa meir om kampen.

Ramo Racic, som i vinter gjekk frå Os til Lysekloster, skåra sitt første for ny klubb.

Birkelund trekk fram den nye keeperen Chris Sunde Midtun som ekstra solid i gårsdagens kamp.

Ny kamp laurdag

Neste kamp går laurdag mot Lura frå Sandnes.

– Lura har spelande trenarar med bakgrunn i Sandnes Ulf og er eit hardtsatsande 4. divisjonslag, seier Ørjan Sandal.