Rekord og Oskar til Thuen

Natt til søndag opna årets fiskesesong i Oselvo, og den 6,5 kilo tunge laksen Tor Åge Thuen tok klokka 02.10 er kåra til årets Oskar.

Henrik H. Sylta tok ein laks klokka 02.08, men uavhengig av kor presis klokkene til dei to fiskarane er så er fangsten ikkje nominert i år.

– Sylta ikkje medlem i Os Jakt og Fiskelag, seier leiar i fiskeutvalet, Kjell Mikkelsen til Midtsiden tysdag.

Ny personleg rekord i natt

Tor Åge, som fylte opp kvoten med to laksar opningsnatta, var natt til tysdag tilbake i Kremretten.

– Klokka 04.15 fekk eg fisk, ein fin laks på 7,8 kilo, fortel Tor Åge.

Thuen sin rekord er på 9,5 kilo, men den er tatt i Orkla. Den ferske fangsten på 7,8 kilo er den største han har tatt i Oselvo.

Den største laksen til no denne sesongen er det truleg Petter Spjell Røttingen som har tatt. Han hamna på elva då han berga fangsten på 8 kilo, tatt i sone 2 på dagtid søndag.

Les meir om laksefisket på Midtsiden samleside: Jakt og fiske