Rettar seg mot førstegangsetablerarar

I skrivande stund er det, på Finn.no, annonsert 80 bustadar for sal i Os.

Utvalet husvære til under to millionar kroner er ikkje så verst, nokre nye leilegheiter går til 1.490.000 kroner.

Men vil du ha ein ny bustad med to soverom er det mindre å velja i.

Selte 2 av 8 første veka

Dei er begge i 30-åra, men har bra med erfaring frå byggebransjen, Børge Moberg som eig byggefirmaet Himo AS og entreprenør Robert Kaastad som eig Os Entreprenør Osøyro AS.

Som privatpersonar har dei gått inn og sikra seg ei fin utsiktstomt i Hegglandsdalen, der dei no rettar seg mot førstegangsetablerarar.

– Vi skal bygga til saman fire 4-mannsbustadar i to trinn. Dei første åtte blei lagt ut for sal i førre veke og to er allereie selt, fortel Moberg.

Det er Moberg sitt selskap Himo Utvikling AS som står som utbyggar.

To soverom til 1,7 millionar

Tomta ligg i Eidsvegen, vegen frå Hegglandsdalen over til Hatvik, med utsikt over Hegglandsdalen og kort veg til skule og to barnehagar.

Alle 4-mannsbustadane er like, med noko lågare pris i førsteetasje i forhold til den øvste.

– Vi trur det er ein god marknad for rimelege hus. 75 kvadratmeter bruksareal og to soverom til 1.690.000 kroner er det beste vi får til mot førstegongsetablerarar.

– Kjøreturen til Eidsvegen er kort frå Os sentrum, no håper vi at ungdomen og andre som er på jakt etter ein god, men rimeleg plass å bu, set pris på den fine naturen i Hegglandsdalen, seier Kaastad.

Korleis bygga billig?

På spørsmål om korleis dei vil forsvara så låg kvadratmeterpris svarer Kaastad, med eit lurt smil:

– Eg har allereie tatt eit tap i dette terrenget, så eg spanderer rabatten.

Han siktar til grunnarbeidet han gjorde for 10-12 år sidan for førre eigar av tomta. Bergensselskapet gjekk konkurs og Robert fekk ikkje oppgjeret sitt.

– Vi kjøpte tomta frå konkursbuet og mykje av grunnarbeidet er gjort. Samtidig gjer eg og Børge sine selskap resten av jobben med grunnarbeid og oppføring, forklarer han.