Riggar til teater-stream

Onsdag ettermiddag er det hektisk aktivitet i Oseanasalen, kor Anders Fløysand i Varde Media riggar til fire kamera og anna utstyr for å senda Riksteateret si framsyning «Fortrolige samtaler» direkte til bebuarane på Luranetunet og på Røde korshjemmet i Bergen.

Oppdraget har kome frå teatersjef Tom Remlov i Riksteateret.

– Då Tom tiltrådde som teatersjef erklærte han at han hadde ein ambisjon om å sjå på moglegheiten for å streama nokre av framsyningane våre ut til fleire. Riksteateret skal vera heile landets teater og speler på 70 kulturhus rundt i Noreg, men det er ein fasinerande tanke å kunne visa ei framsyning fleire plasser samstundes, fortel informasjonssjef Mette Hægland Blom i Riksteateret.

Riksteateret har tidlegare streama programpresentasjonar og pressekonferanser frå sine eigne lokaler i Nydalen i Oslo, men dette er første gang ei framsyning blir sendt i si heilheit.

Oseana var på ballen

I samband med ei samling Riksteateret hadde med kulturhusleiarar fortalde Remlov om tanken og fekk umiddelbar respons frå Oseana-direktør Ole Tobias Lindeberg.

– Eg har i fleire år hatt lyst til å streama frå aktiviteten i huset, så når Tom Remlov kom med denne ideen sa eg med ein gong at vi var klare.

Lukka framsyning

Den utselde framsyninga av Ingmar Bergman sitt stykke «Fortrolige samtaler», iscenesatt av Bergaman si tidlegare kone Liv Ullmann blir ikkje open for alle på nett.

– Nei, det blir ein såkalla closed circle kor ein må få tilgang for å kunne sjå den. Det har mellom anna med rettigheiter å gjera, forklarar Hægland Blom.

Bebuerane på dei to sjukeheimane får via internett og TV-er kobla til nettet tilgang til den eksklusive framsyninga.

– Det siste eg høyrde er at det er eitt beburarrom, ei TV-stove og ein storskjerm som blir nytta på Luranetunet i morgon, fortel Janne Mari Hjelle, marknadsansvarleg på Oseana.

Vil gjera det tilgjengeleg

Bakgrunnen for at Riksteateret vel å senda framsyninga frå Oseana til to sjukeheimer i morgon er fleirdelt.

– For det første er det kjekt å kunne gje dei som ikkje naturleg klarar å komma seg til ein teatersal moglegheiten til å ta del i framsyninga på denne måten.

– Det andre er at dette er ein pilot og eit forskningsprosjekt for oss. Vi vil testa det ut og sjå korleis det fungerar. Vi veit frå andre delar i verda at til dømes konserter som blir streama direkte til kinosalar og liknande er veldig populært. Dette gjev oss erfaring og lærdom i å gjera tilsvarande, forklarar Hægland Blom.

Lokal produksjon

Eit viktig poeng for Riksteateret har vore å bruke lokale produksjonsselskap.

– Vi ønskja ikkje å dra med oss eit produksjonsselskap frå Oslo, men å nytta lokale krefter. Det at ein på Os hadde Varde som kunne ta produksjonen var også ein av grunnane til at det blei Oseana som er piloten, seier Hægland Blom.

Anders Fløysand i Varde Media fortel at dei er godt førebudd til jobben.

– Vi stiller med fire kamera og seks mann i morgon. No har jo vi gjort tilsvarande før (mellomanna frå opninga av Oseana, journ.mrk), men vi har styrka staben i det siste og kan forsikra om at det blir ein høgkvalitets-sending, seier Fløysand.