Rolls-Royce-fabrikken er selt

Rolls-Royce Marine AS har selt fabrikkanlegget i Hagavik i Os kommune til Os Maskinering AS, skriv Rolls-Royce i ei pressemelding i dag.

Les òg: – Fleire kan mista jobben i neste veke

Os Maskinering har i lang tid vore ein leverandør til fabrikken, og dei to selskapa har fornya leverandøravtalen.

60-70 personar blir verande i fabrikken

20 personar som i dag er tilsett i produksjonen til Rolls-Royce får no tilbod om overføring til ny arbeidsgjevar. Rolls-Royce vil òg leiga 47 kontorplassar av dei nye eigarane, og ein mindre verkstad med lager.

Det betyr at 60-70 av dei rundt 90 fast tilsette framleis vil ha arbeidsplassen sin i dei same lokala, for eitt av dei to selskapa.

– Eg informerte dei tilsette på eit allmøte i dag. Det er framleis ein del som har mista jobben sin, så det er ikkje vill jubel i lokalet. Men stemninga er god når så mange no kan bli verande, seier plassjef Charles Kvalvik til Midtsiden.no.

Os Maskinering skal etter planen overta anlegget fra 1. januar 2016.

Les òg: Klare til å overta Rolls-Royce-fabrikken

– Eg vil takka dei tilsette og deira representantar for eit veldig godt samarbeid gjennom ein vanskeleg periode. Det er tungt å måtta seia opp gode medarbeidarar.

Nøgd ordførar

Ordførar Terje Søviknes er takksam for at Rolls-Royce har halde tett dialog med kommunen gjennom heile prosessen.

– Vi har ikkje hatt ei aktiv rolle i dialogen med Os Maskinering, men har vore med i diskusjonane om å finna gode, lokale løysingar, og gler oss veldig over at så mange arbeidsplassar blir verande i Osbygda, seier Søviknes.