Sheehan til Øvredal-film

Deadline.com melder om Trolljegeren-regissøren sitt nye actioneventyr Mortal, filmen handlar om ein ung mann som oppdagar at han har gudeliknande gåver.

IM Global byrja no å selga filmen i Cannes og der blei det kjent at den irske skodespeladen Robert Sheehan har fått ei av rollene i filmen.

Sheehan har jobba med norske regissørar tidlegare. I Skyggejegerne: Demonenes by frå 2013 der Sheehan spelte rolla som Simon, var det Harald Zwart som stod for regien. Han er også snart å sjå i filmen Geostorm.

– Vil visa fram den fantastiske norske mytologien

Filmen Mortal tar utgangspunkt i norsk mytologi og skal vera basert på Øvredal sin eigen idé.

– Ambisjonen min er å bringa den fantastiske norske mytologien ut til eit verdsomspennande publikum, denne gangen gjennom ei moderne, action-basert karakterreise, seier Øvredal til Deadline.com.

Innspelinga skal finna stad i Noreg til sommaren og filmen blir produsert av Brian Kavanaugh-Jones fra Automatik, Ben Pugh og Rory Aitken fra 42 og John Einar Hagen frå Nordisk Film.

Øvredal er i tillegg snart klar med thrilleren The Autopsy of Jane Doe, med Emile Hirsch og Brian Cox i hovudrollene.