Slepp apekattane laus

Søfteland Rock N LoL, som i år har blant anna Ida Maria, Kråkesølv og Razika på plakaten, har kome godt i gang med sal av festivalpass.

– Vi starta tidleg i år og kjører 2010-prisar i starten. Ikkje berre til 17. mai, som først annonsert, men ut veka, fordi passa ikkje kjem i Joker-butikken før onsdag, seier Andreas Lindborg.

Frå juni av blir det fleire vorspiel til festivalen, som finn stad på Sanden på Søfteland fredag 15. og laurdag 16. juli.

Monkeybusiness på Peppes

Først ute er festivalvorspiel på uterestauranten til Peppes Pizza på kaien i Os sentrum.

– Peppes har jo sikra seg heile uteserveringa no. Vi riggar scene på kaien og trur det blir knallbra.

Lindborg har fått Herr Nilsson til å spela på vorspielet.

Herr Nilsson er ikkje det einaste som gjev ape-assosiasjonar, bandet består nemleg av bergensmusikarar frå band som Casio Kids og Kiss Kiss King Kong. Sistnemte såg vi på Søfteland i fjor.

– Det blir truleg eitt band til, eit av dei som skal spela på festivalen, men kven er ikkje sikkert enno.

Flyttar på luftgitarane

I fjor arrangerte søftelendingane konkurranse i luftgitar som kickoff til festivalen. 10-15 ungar og ungdomar stilte opp utanfor Joker-butikken laurdag 5. juli, saman med rundt 100 publikummarar.

– Det blei trongt utanfor butikken, men det var veldig kjekt, synes Lindborg.

I år har festivalen gått i tettare samarbeid med AMFI Os. Luftgitar-konkurransen blir flytta frå Søfteland til Amfisenteret, datoen er torsdag 16. juni.

RIO (Rock i Oseana)

Os Rockeklubb og Søfteland Rock N LoL er del av opningsveka i Oseana, som startar fredag 17. juni.

Måndag 20. juni er det rockarane sin tur, og Rock N LoL nyttar høvet til å ha programslepp.

– Mange namn er klare, men vi har fleire på blokka. Rockeklubben har mykje av regien på kva som skjer i Oseana denne måndagen, og vi er spente på korleis huset fungerer for sånne som oss, ler Andreas Lindborg.

Desse banda er allerie klare for Søfteland 15. og 16. juli:
• Death By Unga Bunga
• Fjorden Baby
• Ida Maria
• Jeroan Drive
• Kråkesølv
• Major Parkinson
• Neoplasma
• Norma Sass
• ORBO & The Longshots
• Razika
• Tôg
• Wolves Like Us