Startar båtsenter

Bjørn Askvik frå Askeladden-familien i Os vaks opp på kaien i Askvik og var fram til 2007-2008 salssjef hos Askvik Maritim.

Etter ein periode hos Argos Båtsenter gjekk Askvik over til bilbransjen, men no har bølgjeskvulpet lokka han tilbake til lukta av plast og outboardolje igjen.

– Det var på tide. Eg har sakna dette, seier Bjørn Askvik, som nyleg starta Austevoll Båtsenter saman med Christian Haveland.

Det nystarta selskapet overtar drifta av Haveland Motorservice og utvidar på Rabben i Austevoll til fullt båtsenter.

I velkjent farvatn

Askvik fortel at han dei siste åra har vore mykje i Austevoll på båttur og at han blei kjent med Haveland etter at han hadde eigen båt på reparasjon ved verkstaden hans.

– Samtalane om å starta noko saman byrja i påsken i fjor. Så blei vi einig om å stifta nytt firma basert på hans eksisterande verkstad-drift, men med utvida fokus på sal av nye båtar og motorar.

– Austevoll er ein god marknad. Eg hadde mange frå Austevoll som kunde då eg jobba på Askvik Maritim og eg kjenner etterkvart kommunen godt.

Motor, plast og nye båtmerker

Anlegget på Rabben har slipp til 60 fot store båtar og tårnkran som løftar 8 tonn.

Austevoll Båtsenter er har plast- og motorverkstad og er merkeverkstad for Yamaha, Mercury og Mercruiser.

– Vi forhandlar båtar som Poseidon, River og Mercury gummibåtar og motorar frå Yamaha, Mercury og Mercruiser. Vi er i sluttforhandlingar om fleire merke både innan båt og motor.

I tilleg får båtsenteret eigen utstyrsbutikk og fleire hallar til vinterlagring.

– Det har blitt ein travel start med mange seina kveldar på verkstaden. No ser eg fram til våren og til å reisa på jobb med båt i staden for bil og ferje, seier Bjørn Askvik.