– Te Øyane, sa du?
Øyafest slepp første band til festivalen i 2024.
«Det er tydeleg at eldre lyttarar er moden for nye låtar, og yngre lyttarar er mottakeleg for å absorbera strilekultur, kystkultur og ukultur frå dette 46 år gamle bandet frå Råthola (bak tekstilfabrikken i Salhus)» skreiv vi om det no 48 år gamle bandet - Vinskvetten - som song for pandemi-full sal i Oseana i 2021.
Arrangørane gjekk ut med dato for neste års festival tidlegare denne veka.
Øyafest går frå torsdag til laurdag 1. til 3. august neste år.
Same dag kom dei første billettane for sal, og desse 50 gjekk unna, rett nok til rabattert pris, på rundt 120 sekund.
I dag er Vinskvetten første slepp, utanom Goggen, til Øyafest 2024.
– Me er glade for at det passa for Vinskvetten å spela hos oss. Dei har vore ein del av kulturen og oppveksta til mange i nedslagsfeltet til festivalen, og kanskje spesielt oss som har vakse opp i Øyane, seier festivalsjefane Ivar og Tommy.
Det blir, som i år, Humrahølo torsdag, telt på Sundøy Arena fredag og telt pluss storscene laurdagen.
Vinskvetten skal spela i teltet fredagen, og der er billettmengda begrensa til rundt 400.
Vinskvetten består i dag av dei tre urgamle karane Bjørn Jensen, Gunnar Kalvik Låstad og Øyvind Østerbø.
Med seg har dei hjelparane Gunnar Bjelland på tangent og Jørgen Østerbø på trommer.
Bjelland har vore støttespelar i snart eit kvart århundre, Jørgen har vore med sidan 2019.
