Tok bronse i eliteturnering på Hamar

Bildeserie:

1 av 2

I helga var fleire av dei beste fotballungdomane i Noreg samla i Hamar.

HamKam Talentcup inviterer i første omgang gutelaga til Tippeliga og Adeccoklubbar, og dei som deltok i TalentCupen i 2014, før invitasjonar går ut til andre.

Eliteturneringa køyrer reine aldersklassar og Os Allianse stilte med to lag i G15 og eitt i G16. Det eine laget i G15 er sett saman av Nore Neset og Os 3 som blei meldt på i nivå 2 på Hamar.

Rauk på straffekonk

Os Allianse G15 gjorde det skarpast og kom til semifinalen i nivå 1. I innleiande rundar vann dei 1-0 over Nanset og heile 7-0 over Høybråten/Stovner før dei gjekk på eit 0-3-tap for Skedsmo.

– Vi var allereie vidare og gutane var ikkje heilt på hugget i denne kampen. Lyn, som vi slo i kvartfinalen, slo ut Skedsmo i 1/8-finalen. Skedsmo var også gode, det var dei som vann på Hamar i fjor, fortel trenar Jan Frode Skeie.

Os vann sin 1/8-finale 2-1 etter å ha leia 2-0 over Gimletroll. I semifinalen, som gjekk mot Sandnes Ulf, blei det 0-0 etter ordinær tid og 3-4 på straffekonk.

– 0-0 var greit. Eg synest Lyn var betre, men Sandnes Ulf var fysisk sterke og det blei få sjansar til begge lag.

Os Allianse G15: Kay Milan Gitowsky, Sander Moberg, Trygve Bjørnevik, Jørgen Kuven, Trym Fløysand, Simen Heggland, Steffen Kvamsdal, Niklas Fosen, Håvard Leonsen, Marius Lyssand, Markus Heggland, Sondre Nystad, Tobias Nøss, Kristoffer Røttingen, Fredrik Sivertsen, Bjørnar Straumsnes, Philip Haarvei og Vegard Skeie.

Gutar 16 til kvartfinale

Gutane som er fødd i 1999 gjorde det også svært bra mot god motstand. Etter 3-2 over Gjelleråsen og 5-2 over Hønefoss blei det 1-1 mot Raudfoss.

I 1/8-finalen slo osingane Stoppen 3-0, men i kvartfinalen blei det 1-5-tap for Eina.

– Vi hadde tre sjansar dei første ti minutta, men fekk eitt mål i mot føre pause og eitt rett etter pause, begge var visst via eigne spelarar og inn. Då det så komeit skot i kryssen gav vi litt opp, fortel trenar John Ole Johannessen, som sjølv gjekk glipp av kvartfinalen då han måtte heim og vinna kamp med Søfteland i 6. divisjon.

Eina vann seinare finalen over Jerv.

Os Allianse G16: Martin Aspenes Sjøbø, Carl-Otto Curran, Tobias Døsen Borgen, Ludvig Drange, Mathias Nystad, Jonas Fagerbakke Hovland, Andreas Kytiri, Endre S Nordtvedt, Joakim Kvernes Forstrønen, Fredrik Haustein, Magnus Sund, Fabian Reiertsen, Adrian Lekven Fimreite, Kristoffer Alves Brekke, Erik Enes og Lasse Styrvoll.

Mista finaleplassen

Nore Neset/Os vann 4-1 over Bærum og 5-0 over Eidsvoll før dei spelte 0-0 mot Fana i nivå 2. I kvartfinalen blei det 3-0 over Bærum 2 før dei mista leiinga i semifinalen mot Skedsmo 2.

– Vi leia 1-0 og såg ut til å ha bra kontroll. Men så slapp vi dessverre inn to på slutten, fortel trenar Stian Nyhus.

Nore Neset/Os G15: Kay Milan Gitowsky, Liam Samuel Askvik, Brede Søfteland, Eirik S. Haga, Aleksander B. Sulen, Johannes D. Lie, Peter F. Myksvoll, Mathias Sørstrønen, Lars Hadler Olsen, Fredrik Solbakken, Arild Strømsvåg, Kristian Blomberg, Lars Ivar Nyhus, Robert Jellestad, Thomas V. Haavardstun, Tobias H. Magnus, Vegard Hatlelid og Jonas Sunnfjord.

100 gutespelarar i Os

– Det var ein veldig fin tur der elitegutane verkeleg viste kva dei er gode for, at dei fortener plassen på laget. Med sjuke og skadde keeperar fekk dei to som sto for tre lag verkeleg kjørt seg, seier John Ole.

– Samtidig ser vi at gutane frå Nore Neset og Os 3 held høgt nivå. Det er veldig gledeleg å sjå at Os kan stilla med tre juniorlag i Norway Cup og at vi i Os og Nore Neset no har heile 100 gode spelarar på G15/G16-nivå, seier Jan Frode Skeie.