Tre skular saman om stort show

Bildeserie:

1 av 11

– Eg er veldig glad for initiativet, samarbeidet og resultatet. Vi på skulen har fått veldig fine meldingar dei siste dagane, frå foreldre som er stolte og nøgde etter framsyninga, fortel rektor Ann-Irene Brunvoll ved Strøno barneskule.

130 elevar frå Øyane, 70 frå Hegglandsdalen og 56 frå Strøno sto for framsyninga «Barn av regnbuen», for fullsett Oseana onsdag kveld.

Musikklærarane Anne Leni Søfteland og Terje Neset har vore sentrale. Initiativet kom frå rektor i Øyane, Gunnhild Hansen.

– Då eg byrja som rektor i Søre Øyane, etter fleire år som lærar på Kuventræ, var Kuventræ barneskule i gang med øvinga til ny stor framsyning.

Annakvart år øver dei over 200 elevane på Kuventræ inn større show (sjå video frå 2016 og 2013).

– «Tenk om vi kunne fått til noko liknande her», var mi innstilling på ny skule. Så snakka eg med Terje og Anne Leni, og dei var heilt med frå første stund.

Med venskap som tema

I august var det møte mellom skulane. Så blei det laga ei prosjektgruppe som planla tema, låtar og fekk det heile til å bli samkøyrde.

To av skulane har vennebenkar, og venskap på tvers av skulane blei tema.

– Vi hadde seks songar som vi øvde inn felles, og fleire individuelle innslag mellom desse seks. Terje og Anne Leni har reist rundt og hjelpt til på alle skulane, samtidig som dei tilsette har slutta opp om dette og stått ekstra på, seier Brunvoll.

Kvar skule visste lite om innslaga til dei andre før generalprøve og framsyning onsdag.

– Det var nok ein del elevar som etterkvart var litt leie av å øva då det nærma seg show. Dei visste ikkje kor stort det ville bli, men det trur eg dei forstår no, seier Gunnhild.

Lager felles aktivitetsdag i Hegglandsdalen

Etter ei strålande framsyning for 500 foreldre og besteforeldre i Oseana, og flotte tilbakemeldingar frå tilskodarane, er det kvardag og påskeferie før elevane igjen skal samlast.

Då blir det ikkje side om side for å underhalda, men en dag der temaet frå framsyninga verkeleg skal praktiserast.

– Det har vore ei fin tid med øving og framsyning, i mai skal det bli veldig kjekt å samla elevane til aktivitetsdag og grilling, seier rektor ved Hegglandsdalen barneskule, Jarle Reppen.

Hegglandsdalen idrettslag har sponsa med 25.000 kroner og 260 elevar frå tre skular skal få ein flott dag på Inn på tunet-garden til Tore Øvreeide.

– Der blir det pil og boge, fisking og padling - og mykje tid for elevane til å bli betre kjent, seier Reppen.