Troll i trollgarnet?

Då Knut-Inge Johnsen og sonen Håkon drog trollgarn laurdag fekk dei noko dei ikkje har hatt i stampen før.

– Det er mogleg dette ikkje er så uvanleg lenger, men det er første gong eg har sett og fått St Petersfisk, fortel Knut-Inge.

Ifølgje Wikipedia høyrer St. Petersfisken heime i Middelhavet, men har med åra blitt noko vanlegare å sjå langs norskekysten nord til Trøndelag.

St. Petersfisk kan bli opptil 90 cm lang og 8 kg tung.

– Ved Middelhavet blir den rekna for å vera ein av dei aller beste matfiskane, sa biolog Jens Andreas Huseby ved Akvariet i Bergen til bt.no i eit intervju i 2008.

– Den er heilt rå. Når den et kjem kjevane ut av munnen, og den ser ganske snål ut. Den er også heilt flat og symjer av og til rett opp og ned, og andre gongar på sida, fortel biologen, og seier Akvariet cirka 15 gongar i året får meldingar frå folk som har fått St. Petersfisk i garnet.