Trur Lysekloster rykker opp

Den første spådomen etter avdelingsoppsettet for 2013 var Os på 5. plass og Lysekloster på 7. plass, men seinare blei oddsen justert og Betsafe spådde Lysekloster på 2. plass (6 i odds på opprykk) og Os på 7. plass (15 i odds på opprykk).

Og Os landa på 7. plass og Lysekloster på 2. plass i årets serie.

– Lysekloster og Haugesund 2 i toppen

No har avdelinga for 2014 kome, framleis med Os og Lysekloster i same serie, og Betsson, som er først ute med odds på 3. divisjon, har stor tru på Lysekloster og lite tru på Os.

Betsson.com gjev opprykk til Lysekloster 2.85 i odds. På plassen bak følgjer Haugesund 2 til 3.40 i odds.

- Vi føler at det er desse to opprykkskampen vil handla om. Lysekloster er ein liten favoritt no, men 2. lag er alltid skumle. Haugesund 2 vil i enkelte kampar heilt klart ha det beste laget i avdelinga, men dei vil nok variera meir enn Lysekloster, esier oddssetjar Daniel Vassbund frå Betsson.com.

Betsson har plassert Os på 10. plass med heile 29 i vinnarodds.

Trioen Lyngbø, Øystese og Varegg blir rekna som opprykks-outsidarar.

SJÅ HEILE LISTA NEDST I ARTIKKELEN

– I tråd med målet vårt

Dagleg leiar i Lysekloster IL, Ørjan Sandal, er ikkje overraska over at Lysekloster er favorittar.

– Vi framsto bra i år og vi jobbar målretta for å bli endå betre i 2014, seier Sandal.

I tillegg til nysigneringar som Preben Borgen, Ramo Racic og keeper Chris Sunde Midtun, skal klubben ta inn 3-4 spelarar til.

– Nokre er på prøvespel med oss no, andre er vi i dialog med. Det blir spelarar som anten kjem frå 2. divisjon eller som har prestert godt i 3. divisjon i år.

Utanom desse får klubben tilbake fleire spelarar som rauk ut med skade og gjekk glipp av 8 til 15 kampar i haust.

Blant desse er Eirik Musland, Daniel Kalstad, Eirik Indredavik, Preben Skorpen og Mattias Høiland. I tillegg kjem Sigve Rørstad, som reiste til utlandet i haust, tilbake i mai.

Trener to gongar for dagen

– Men det viktigaste er treningshaldningane deira, at dei er innstilte på å følgja det løpet vi har lagt opp.

Sandal fortel om seks økter i veka, to per dag måndagar og torsdagar, allereie no i november.

– Vi skal trena litt meir enn før, men med endå betre kvalitet, konsentrasjon og tempo enn før.

Lysekloster sitt A-lag blir no leia av Torbjørn Birkelund og Øyvind Olsen, medan Thomas Sandal står for fysisk fostring.

Tidlegare Os-trenar Tore Nielsen har ansvar for andrelaget og for spelarutvikling på yngre lag, Arne Hitland er med vidare som koordinator og oppmann.

Vinnarodds 3. divisjon frå Betsson.com:

1. Lysekloster 2.85
2. Haugesund 2 3.40
3. Lyngbø 6.50
4. Øystese 7.00
5. Varegg 7.50
6. Vadmyra 10.00
7. Bjarg 14.00
8. Sotra 29.00
9. Fyllingsdalen 2 29.00
10. Os 29.00
11. Vard 2 35.00
12. Frøya 60.00
13. Odda 100.00
14. Smørås 125.00