Usamde om fortau

Den private reguleringsplanen for Osstølen (Sveo) blei torsdag handsama på ny i plan- og bygningsutvalet. Sist utvalet hadde saka til handsaming krevde dei meir fortau lagt inn i planen. Dette gjorde at tiltakshavar trakk saka før den kom opp i kommunestyret.

No har tiltakshavar fremja saka på nytt. Framleis uten fortau, men med framlegg om humpar som fartsreduserande tiltak.

– Vi var alle einige om å fremje fortau her oppe. Hensikten med det var å sikra dei mjuke trafikantane. No blir det påstått at fartshumpar er betre for å redusera farten og for å ta dette omsynet. Eg er ikkje sikker, opna Harald Døsen (Ap) diskusjonen med.

Framtidig utviding?

Gustav Bahus (Frp) hang seg på Døsen sitt innlegg med først å ta sjølvkritikk på at utvalet kanskje hadde vore litt upresise i førre vedtak.

– I referatet sto det at vi ville ha fortau på alle vegane i feltet.

– Det vi jo ønskja etter ei lag og grundig diskusjon var å sikra dei mjuke trafikantane der kor det var mange bueiningar og kor det tydeleg viser utvidingsmoglegheiter av feltet ein gong i framtida.

– Vi veit jo at det er vanskeleg å etablera eit fortau i ettertid om vi ikkje set av areal til det i dag, argumenterte Bahus.

For barnetalsmann Jonny Haugland var politikarane si haldning som musikk i øyro.

– Eg er tilhenger av fortau. Vi freister å lære ungane våre å gå på fortau og då er det uheldig å ikkje leggje til rette for det.

Blei irritert på administrasjonen

Plansjef Aina Tjosås ba utvalet om å grunngje vedtaket med hjemmel.

– Juristen nede seier at det er viktig å fatta eit vedtak som seier kvifor de gjer det og hjemla det.

Dette fekk Gustav Bahus til å reagera.

– Det sit åtte stykk frå administrasjonen her. Då må de kunne gje oss eit råd om korleis hjemla det.

– Vi har sagt kva vi ønskjer. Då må de kunna hjelpa oss med å fatta eit lovleg vedtak ellers er det inga vits at de sit 8 stykk her, tordna det frå Bahus.

Svekkar økonomien

Tiltakshavar og arealplanleggjar var tilstades i møtet og fekk argumentera for den løysinga dei har vald.

– Vi har lagt fortau på tilførselsvegane og samlevegane. Eit fortau vil bli veldig oppstykka med inn og utkøyrsler til husvera på dei vegane de snakkar om. Difor meiner vi at det er betre for dei mjuke trafikantane å laga fartshumpar for å redusere farten.

– Vi har forøvrig følgd dei normane som kjem frå Statens vegvesen. Det er unaturleg for oss å ta inn i ein plan som held seg innanfor kommunedelplanen kor det tilgrensa området er satt av til grøntområde fortau for ei eventuelt framtidig utbygging, orienterte arealplanleggjaren.

– Jo, men vårt argument er at om vi ikkje gjer det no, så går toget, svara Sonja Vernøy Hansen (Frp).

– Kva konsekvensar får det om vi står på krava om fortau då, undra Terje Sperrevik (TvS).

– Det har med økonomi å gjera. Areal til fortau vil gå utover antal bustader. Det spørs om vi klarar å få økonomi i prosjektet, svara Bjørn Døsen på vegne av tiltakshavarane.

Utvalet lot ikkje argumentet om økonomi få telja og vedtok, som sist, samrøystes at det skulle leggast inn fortau på fleire av vegane.

–