Varma opp med 616 trappetrinn

Søndag ser eit nytt motbakkeløp dagens lys, Langedalen Opp er 2000 meter lang og har ein høgdeforskjell på rundt 150 meter.

Andreas Søfteland frå Søfteland TIL er med å arrangera løpet, og har sjølv plan om å delta. Men førebuingane blei i hardaste laget.

– Vi var tre løparar frå Os, eg, Geir Skaten og Klas Færøvik, som bestemte oss for å prøva oss opp Munketreppene, fortel Andreas.

Munketreppene Opp er ein tur som tar rundt 4 timar i vanleg gangfart.

Turen tar deg frå båthamna i Lofthus rett forbi fjelltoppen Nosi, ei 5,5 km lang løype med høgdeforskjell på 1000 meter.

616 trappetrinn er del av løypa som dei sprekaste bruker ein knapp time på.

Geir Skaten var beste frå Os og landa på 3. plass. Andreas fekk 5. plass og Klas 11. plass.

– Eg er veldig nøgd med tida og plasseringa, seier Geir Skaten, som blant anna vann første versjon av Liafjellet Opp for nokre år sidan.

– Det var hardt, men vi er framleis gira på Langedalen Opp i morgon, lover Andreas.

Les meir om Munketreppene Opp på munketreppene.no.