Vellukka forflytning

Det var knytt litt spenning til korleis det ville bli å ha romjulsbluesen i Oseana etter mange år med livlig lag i Fjellheim.

- Vi har allereie solgt fleire billettar enn det vi hadde kapasitet til i Fjellheim, fortalte økonomiansvarleg Hans Bjørn Bakketeig i Osøren Blues & Jazzfestival då dørane opna.

Vel 400 festglade osingar fann vegen ut på Mobergsneset for å feira at 2011 går mot slutten med Yngve & His Boggie Legs og Vetrhus Bluesband. Dei fekk ein triveleg kveld med gode vener.

- Eg har aldri sett Vetrhus så bra som i kveld, fortalte ein oppglødd festivaldirektør Gunnar Nagell Dahl då oddingane var halvegs i første settet.

God kveld på jobben

Noko av grunnen til at det satt for Vetrhus var at dei hadde tatt med seg tidlegare Vamp-medlem Geir Aksnes på orgel, noko som bidrog til eit meir heilhetleg lydbilete.

Både Vetrhus og Vossagutane i Yngve & His Boogie Legs hadde ein god kveld på jobb og leverte dansbar musikk av høg kvalitet, noko osingane etterkvart viste å sette pris på med å fylle dansegolvet. Berre litt synd at mange kom seint og dermed gjekk glipp av dei dyktige vossingane.

Sjå klipp frå eit par av låtane til dei to banda i videoen nedanfor (foto: Andris Hamre)