Viktige kontraktar for Os-gründarar

Lean Konseptutvikling, som står bak Byggemappen, blei tidlegare i haust nominert til Byggenæringen sin innovasjonspris for 2017.

No tek dei vidare steg for å utvikla appen, som skal sikra kvaliteten og letta kommunikasjonen mellom dei ulike aktørane i eit byggjeprosjekt.

– Vi har nyleg fått godkjent forskningsprosjektet "Samhandlingssystem med prediktiv analyse for byggeprosjekter". Det handlar om at vi sett opp eit neuralt nettverk som kan indikera og forutsjå feil i byggjeprosjekta før dei oppstår, basert på innsamla data i tidlegare prosjekt, fortel dagleg leiar Jan Tore Grindheim.

Treff med stor sannsynlegheit

Forskningsprosjektet er eit samarbeid med Høgskulen i Vestlandet og er støtta av Forskningsrådet i to og eit halvt år.

– Vi har fått med oss matematikar Christian Bjertli, truleg ein av dei beste i Noreg på datalæring. Han skal hjelpe oss med mønstergjenkjenning og bygginga av algoritmen som skal kjenna att mønstra i prosjekt kor det oppstår feil. Med dette på plass skal vi kunne forutsjå risikoen for personskade, forseinkingar og kvalitetsavvik med stor sannsynlegheit.

– Dette vil gje kundane våre moglegheiten til å gå inn med korrektive tiltak tidleg i prosessen, forklarer Grindheim, om prosjektet som allereie har eitt år med datainnsamling bak seg.

Utvidar til servicenæringen

Så langt har Byggemappen først og fremst dreid seg om store, komplette byggeprosjekt. No har dei teikna innovasjonskontrakt med Recover Nordic for å utvikla systemet for servicenæringen.

– Recover Nordic er den perfekte samarbeidspartneren for oss i vidareutviklinga av Byggemappen inn mot servicenæringen. Stor variasjon i oppgåver og eit ønskje om kontinuerleg forbetring, saman med ein sterk og omstillingsvennleg leiing, er viktig for å driva fram innovasjon og tilfredsstille framtidas krav i byggenæringa.

Stort spenn i oppdraga

Innovasjonskontrakten er inngått mellom Recover Nordic, Lean Konseptutvikling og Innovasjon Norge.

– Recover Nordic er eit skadesaneringsfirma som kjem inn etter at uhellet har vore ute. Dei har eit stort spenn i oppdraga og i utgangspunktet har jo dei kunder som er misnøgd. Ved hjelp av Byggemappen kan dei dokumentere rivingsprosessen, vise eventuelle ytterlege vannskader og handtere alle endringane undervegs i arbeidet med å bygga opp att det skadde rommet, noko som er viktig for sluttkunden.

– Recover Nordic støttar oss med fleire hundre timar i pilottesting og liknande etterkvart som vi utviklar appen. I tillegg får det ringverknader også lokalt. Vi kjem til å leige inn kompetanse frå Lean-firma i Os i prosjektet. Det er utslagsgivande for at vi skal klara å gjennomføra prosjektet i ein bransje kor vi konkurrerar med dei store IT-husa, avsluttar Grindheim.