Vil bygga 6 + 17 nye leilegheiter

Bildeserie:

1 av 2

Det var hausten 2012 at Joa Gruppen AS kjøpte den til saman 8000 kvadratmeter store eigedomen ved elva i Os sentrum.

– Då var det allereie fleire nyare bustadar i bygget, selt og organisert i burettslag, fortel André Angelskår frå Joa Gruppen.

– Men no held vi på å bygga 6 nye, og i neste trinn søkjer vi om yttarlegare 17 leilegheiter.

«Folkeleg» prisklasse ved elva

Huseigarane er i gang med bygging av seks nye leilegheiter i øvste etasje i enden mot Oselvo.

– Vi vil bygga dei ferdige før vi legg dei ut for sal. Dei står nok klare i august, at vi får salsstart i september.

Det blir éin 3-roms og fem 2-roms, frå cirka 35 til 55 kvadratmeter store, med «folkeleg» pris.

Lokala som blir ombygd til husvære var tidlegare til næring, med ABO plan og arkitektur som leigetakar fram til dei flytta til Vindu mot Fjorden.

ABO er no engasjert for å teikna ny fasade, ny etasje og endå fleire leilegheiter i det store kvartalet.

Kan få 17 nye i ny 5. etasje

Bygget er i dag på 4 etasjar, men eigarane vil søkja om ein tilleggsetasje.

Ein ny stads- og moglegheitsanalyse har skapt stor politisk vilje og fleire signal på at Osøyro i nær framtid kan få regulering som tillet opp til 7 etasjar.

– Det blir nok ei opptrapping frå sjøen og elva og innover i sentrum, så vi reknar med at fem etasjar er passeleg for vår eigedom, seier Angelskår.

I planen, som Joa Gruppen håper å få ferdig godkjent i løpet av 2014 for bygging og sal i 2015, er det også ny fasade på delar av huset inn mot Brugata.

Parkering og mini-park

Parallelt med bygging av husvære held huseigarane på med bygging av parkeringsplassar i delar av gateplan-etasjen.

– Vi får rundt 50 plassar inne og ute, noko som skal vera rikeleg til både bustadar og leigetakarar i næringslokala.

Delara av utearealet ved elva, nærmast Osbrua, held ABO på å teikna inn ein liten grøn oase.

– Det er ein fin plass om morgonen og på dagtid, tett på Oselvo med fin sol. Får vi opp nokre benkar og ei utforming som liknar eit lite parkområde så kan dette bli ein kjekk plass for kven som helst å setja seg ned.

– På tide å posisjonera seg på gateplan

Joa Gruppen har den siste tida tatt inn nokre nye, mindre leigetakarar, som Varde Studio, der G-Sport tidlegare heldt til.

Men dei har ledig nokre lokale oppe ved Osbrua, og det større lokalet der Posten heldt til fram til mars.

– Vi hadde håpa på å få Vinmonopolet inn, men det gjekk ikkje. Det har vore nokre andre interessentar og vi har tru på at vi med tida vil få inn ny leigetakar også her.

– Akkurat no er det nok leigetakar sin marknad, men det er nok ikkje så lenge til at Os sentrum får seg fleire løft.

– Dette er tida for å posisjonera seg med leigekontraktar i gode lokale, folk som vi driva butikk bør vera på banen frå no og i tida framover, det kan dei tena på, seier André Angelskår.