Viste musklar

Bildeserie:

1 av 8

Onsdag tok Lysekloster imot Bjarg til første kvalifiseringsrunde i NM.

Første skåring kom før første minutt var gått, og Lysekloster gjekk opp i 3-0 og 4-1 før kaptein Baste Jonassen i 2. omgang fekk sitt andre gule kort og Bjarg reduserte til 4-2 og 4-3.

Bjarg heldt presset oppe, men så, då Tommy Gaustad etter eit par miss kom seg rundt keeper og auka til 5-3, fekk heimelaget roen igjen.

Lysekloster - Bjarg 5-3 (3-1)
Målskårarar, Lysekloster: Lars Henrik Skage 2, Hans-Christian Nysæter 2, Tommy Gaustad, Preben Skorpen og Ola Sjømæling/sjølvmål av Bjarg-keeper.

– Det var synd vi klarte å laga offside då vi kom 4 mot 2 på kontring på stillinga 3-0, der burde vi punktert kampen. Så fekk vi kontring og 3-1 i staden.

– Men at gutane på 4-3, med éin mann mindre, klarer å stabilisera seg og få kontroll igjen vitnar om ein enorm lagmoral. Dette er eg nøgd med, seier trenar Ørjan Sandal.

– Store delar av kampen var OK

Tidlegare Lysekloster-trenar Torbjørn Birkelund leiar no Bjarg. Han er nøgd med store delar av kampen.

– Det høyrest kanskje dumt ut etter 7-3-tap, men at vi heng med Lysekloster i så store delar av kampen er bra av oss. Seks av måla er direkte følgje av personlege feil. Det har vi slite med i treningskampar i vinter, og det jobbar vi framleis med, seier Birkelund.

Bjarg hadde presset, men klarte ikkje skapa dei store sjansane før pause. Nærmast var dei kanskje då Morten Vik Tvedte dansa rundt Lysekloster-forsvaret og avslutta godt inntil stolperota. Men der låg Midtun langstrak og slo til corner.

3-1-skåringa førte til at Jonassen fekk sitt første gule. Det var tvilsamt om ballen var over linja, og linjemannen hang etter på kontringa og kan ifølgje ein del av spelarane og publikum ikkje ha vore sikker på om ballen var inne.

Nydeleg av Nysæther

Etter at Skage skåra på eit innlegg av Jonassen rundt 20 sekund ut i kampen auka Ola Sjømæling til 2-0 på innkast via klypene til Bjarg-keeperen, som var uheldig og mista ballen i mål.

Sjømæling gjorde god figur som innbytar for Daniel Kalstad, som måtte ut med skade i kneet tidleg i omgangen.

3-0 kom på heading av den same Skage.

Preben Skorpen sette inn 4-1 rundt 5 minutt ut i 2. omgang. Så kom Jonassen si utvising etter takling av ein Bjarg-spelar og nytt gult kort. Frisparket førte til 4-2, ein glipp på kant leia til gjennomløp og 4-3.

Tommy Gaustad hadde eit uheldig mottak og ei svak avslutning med venstrefoten før han på kontring kom seg forbi keeper og sette inn 5-3 ti minutt før slutt.

– Det var godt å skåra og det var godt å få ro i laget igjen. Då vi samla oss og fekk opp konsentrasjonen igjen så blei vi også meir presise, seier Tommy.

Nysæther gjorde mykje sjølv og skåra på retur frå eige skot då Lysekloster gjekk opp i 6-3. Gaustad kunne ha avslutta sjølv rett før slutt, men sendte ballen på tvers av midtforsvaret og Nysæther kunne setja inn kampens siste mål.

– Vi var innstilte på at dette kom til å bli ein kamp med mykje kjemping. Eg synest vi klarte oss bra med éin mann mindre, og då vi la oss bakpå så kom også overgangane, seier Hans-Christian til Midtsiden.

Lysekloster sitt lag: Chris S. Midtun - Baste Jonassen, Preben Skorpen, Aleksander Andersen, Sindre Flaa (kåra til dagens beste Lysekloster-spelar) - Hans-Christian Nysæther, Espen Birkeland, Kim André Liseth - Lars Henrik Skage, Daniel Kalstad og Tommy Gaustad.

Innbytarar med speletid: Ola Sjømæling, Sigve Rørstad og Joakim Hjelmeland