Byggestart på Kuventræ

Bildeserie:

1 av 4

I desember kom forslaget om å utvida Kuventræ barneskule, i januar blei teikningane sendt inn til byggesaksavdelinga og i dag, måndag 10. februar, var det byggestart.

Parkeringsplassen ved skulen, sandvolleyballbanen, klatreveggen og stien ned til nedre kunstgrasbane er stengt av.

Byggestart i dag

Vestafjell starta med å sperra av området med påfølgjande felling av tre på tomta der tilbygget skal byggast.

Det var også anbodsmøte med synfaring for handverkarar.

– Vestafjell tar i første runde rydding av tomta og grunnarbeid, då dette kjem inn under rammeavtalen vår.

– Anbodsrunden skal gå så raskt som mogleg, for det hastar å få opp denne skulen, seier prosjektleiar Tor Inge Døsen frå Os kommune.

– Vi vil no ut med eit skriv til foreldra der vi fortel om arbeidet og gjev informasjon knytt til trafikktryggleik i byggeperioden, fortel inspektør ved skulen, Kjetil Gulbrandsøy.

– Mesteparten blir som før, men det blir no biltrafikk heilt inn til skulen, og ein del tungtransport.

Frå 12 til 16 klasserom

Tilbygget blir på til saman 484 + 219 kvadratmeter (1. og 2. etasje) og skal husa fire klasserom, garderobar, toalett, opphaldsrom og fellesareal.

I dag har skulen 14 klassar og 12 klasserom. Det tidlegare tekstilrommet, som seinare blei asis-rom, er saman med mediateket no brukt som klasserom.

Frå august i år får skulen 16 klasserom.

Les òg: Slik blir Kuventræ skule