midtsiden

Exeter til Os

I fjor slo dei Leeds 2-0, om to veker møter League One-laget Exeter City med norske og engelske fans opp på Kuventræ for å spela mot Os.

Av: Kjetil Vasby Bruarøy

Exeter City FC, som speler i League One (tredje høgaste nivå) i England, kjem til Bergen for å spela treningskamp mot Os, Fana og Follese.

Kampen mot Os går på Kuventræ laurdag 16. juli.

– Dette synes vi er spennande. Vi kjem til å bruka tida fram mot kampen til å laga litt opplegg rundt dette møtet, seier sportsleg leiar i Os Turn, Roald Stigen.

Han håper blant anna på å få til eit foredrag med Steve Perryman i forkant av kampen.

– Perryman, som er mest kjent for si lange karriere i Englands beste klubb, har engasjert seg både i Exeter og i Bergen, seier Tottenham-supportar Stigen.

Utan Lunde og Borgen

Kampen mot Exeter kjem mellom Os sin siste kamp før ferien, onsdag 6. juli heime mot Stord, og første kamp etter ferien, onsdag 10. august borte mot Sotra.

Os må klara seg utan kaptein Stian Lunde og høgrekant Preben Borgen. Dei må også klara seg utan trenar Øyvind Steffensen.

– Eg trur gutane kjem til å klara seg bra. Eg er meir uroa for at Exeter tar nokre av spelarane mine med seg til England, ler Øyvind.

Os Turn har fått bror til Øyvind, tidlegare A-lagstrenar Frode Steffensen, til å leia laget denne kampen.

Redda av supportarar

Exeter, med kallenamnet The Grecians, har ei lang og litt spesiell historie.

• Stifta i 1904, heimebane; St James Park (må ikkje forvekslast med Newcastle sin bane)
• Spelte, som verdas første klubblag, mot Brasil i Rio i 1914
• Spelte i The Football League (4. nivå) frå 1920-2003

Etter nedrykket i 2003 gjekk klubben inn i ei turbulent tid. Det enda med at supportarar tok tak, stifta Exeter City Supporters Trust, og overtok eigarskapen og leiinga i klubben.

Trekninga og resultata i FA Cupen i 2005 blei vendepunktet. I 3. runde blei det Manchester United. 0-0 på bortebane med 70.000 på tribunen gav Exeter ei inntekt på over 600.000 pund. Heimekampen enda med 0-2-tap, men klubben sin økonomi var redda.

Med manager Paul Tisdale har Exeter kome seg opp i League One, der dei i år hamna på 8. plass.

Norske og bergenske fans

– Exeter har ein liten, men dedikert og lystig supporterklubb i Noreg, fortel Kristoffer Sandnes.

Supportarklubben, som blei stifta 2. juni 1993, samme dag som Noreg slo England 2–0, har rundt 30 medlemmar.

– Vennskap og forbrødring oppsto mellom norske og engelske supportarar frå Exeter, og sidan den tid har det berre utvikla seg. Vi har blitt mottatt på ein utruleg flott måte av både supportarar og klubb, og vi har vore på mange turar kvart år for å sjå Exeter spela.

I 1999 blei Exeter City bedriftsidrettslag i Bergen stifta. Laget har blitt bergensmeistrar og har rykka opp frå 5. ti 1. divisjon.

Eksterne lenkjer:
exetercityfc.co.uk
exeter.no
Om Exeter på Wikipedia

Fleire saker

bilde-midtsiden

29 millionar til bruer

20. september 2017

Fylkesvegar • Fylkeskommunen vil setta av 29 millionar til bruer og 18 millionar til Åsen-Helleskaret.

bilde-midtsiden

Østervold matchvinnar igjen

19. september 2017

Lysekloster fekk det tøft mot Aalesund 2, før utvisinga, men nok ein gong sørgja Kristoffer Østervold for full pott.

bilde-midtsiden

Musikalsk Grytten-premiere

19. september 2017

– Det er ei gåve å ha Espen Leite på trekkspel, seier Albert og Anna-skodespelarane. I morgon har dei Noregspremiere i Os.

bilde-midtsiden

Slo Sædalen på heimebane

19. september 2017

– Vi varierer for mykje, seier Kvile, sjølv om Os 2 har tapt berre 1 av 6 kampar etter ferien.