Feirar med spelemannslaget

Søndag 29. januar inviterer janitsjaren i Os musikkforening til den årlege nyttårskonserten!

– I år har vi bede Os spelemannslag om å feira det nye året saman med oss, og vi ønskjer velkommen til ein variert konsert i Oseanasalen, seier Ruth Elin A. Midtbø.

Os spelemannslag byr på både reinlender, hamborgar, vals og slåttemusikk. Dei har eit samarbeid med Os folkedanslag som vil nytta høvet til å visa fram nokre dansar medan spelemannslaget spelar. I tillegg vil tidlegare medlem av laget, Eirin Røykenes, kveda.

Os spelemannslag er eit lite, men eksklusivt lag som øver i Oseana.

– Dei har eit stort ønskje om at Os kulturskule vil oppretta ei eigen folkemusikkline, det ville nok gjeve vekst i laget samstundes som viktige musikktradisjonar ville bli ført vidare på ein god måte.

Janitsjaren, med sin dirigent Rune Hanisdal, stiller som vanleg med eit variert og spanande program.

– Det er funne plass til mykje - mellom anna korpsmusikk av Gustav Holst, ein russisk marsj, musikk som høyrer heime på ein nyttårskonsert og morosam musikk av den lette sorten. Solistar frå egne rekkjer blir det òg.

– I tillegg til den musikalske opplevinga blir det anledning til å slå av ein prat med kjente og andre musikkvener i pausen. Alt ligg til rette for ein hyggjeleg kveld frå klokka 18 og utover, seier Midtbø..