Fotballcupen der alle skal kvila

Barnecupen Os Fotball arrangerer i juni kvart år har hatt mange namn, frå Drageset, Rema 1000 og Bjørnefjorden til Bendit Cup i nyare tid.

Sjå bildeserie og video frå cupen i 2015.

Os Fotball har halde fram med samarbeidet med Bama og Bendit, som no har utvida fokus frå 5 om dagen til ein breiare offensiv for betre helse og auka livskvalitet.

Dei to nye dimensjonane er «move» og «sleep», rørsle og søvn. Norske 15-åringar er meir inaktive enn 70-åringane og over 30 prosent av vaksne nordmenn har problem med søvnen.

– Os Fotball er ein av få som blei valt ut som EAT MOVE SLEEP-ambassadør. Dette ser vi på som både ei tillitserklæring og eit kvalitetsstempel, det er noko vi glade og stolte over, seier formann Erlend Eidhammer.

Noko av det som er nytt i år er EAT MOVE SLEEP CAMP, der det både er «shootout-telt» og eit eige søvn-telt.

– Saccosekkane har kome! Alle deltakarane skal innom søvn-teltet der dei får informasjon og der dei får seg ein power-nap, fortel Endre Brenne frå Os Fotball.

122 lag frå 18 klubbar

Os Fotball har over 800 spelarar fordelt på 55 lag, frå dei yngste, gutar og jenter fødd i 2010, til fire seniorlag (3 x herre + damelag) og eitt oldboys.

Cupen EAT MOVE SLEEP er for spelarar i barneskulealder, frå 7 til 12 år.

– Vi ligg på høgde med fjoråret med 122 påmeldte lag frå 18 ulike klubbar.

Frå klokka 9 om morgonen til ut på ettermiddagen, laurdag og søndag, blir det eit yrande liv på Kuventræ med sport og spel, servering og - kvile.

Vêrmeldingane kunne neppe vore betre, det er meldt skyfri himmel og 20-24 gradar både laurdag og søndag!

Vil du vera publikum? Her er kampoppsettet.

Helga blir runda av med A-laget sin heimekamp mot Nest-Sotra 2 klokka 17.00 søndag.